විදේශ විනිමය සංචිත ක්ෂයවීම සහ පෙර නොවූ විරූ ලෙස දේශීය මුදල් අවප්‍රමාණය වීමත් සමඟ පාකිස්තානයේ ආර්ථිකය ශ්‍රී ලංකාවේ රටාව අනුව පිරිහෙමින් පවතින බවට ප්‍රමුඛ පෙළේ ආර්ථික විශ්ලේෂකයන් ගණනාවක් අනතුරු අඟවා තිබේ.
මේ වන විට පකිස්තානය තුළ මධ්‍යම ආණ්ඩුව නිසි ලෙස ක්‍රියාත්මක නොවන බැවින් පාකිස්තානයේ ආර්ථිකය තවදුරටත් කිසිවෙකුගේ රේඩාර් පද්ධතියකට හසු නොවන පාලනයෙන් ගිලිහුණු සුක්කානම රහිත නෞකාවක් බවට පත්ව ඇතැයි ඔවුහු පවසති.
එරට ශ්‍රේෂ්ඨාධිකරණයේ නිර්වචනයට අනුව, ෆෙඩරල් රජයක් අගමැති සහ ෆෙඩරල් කැබිනට් මණ්ඩලයකින් සමන්විත වන නමුත් දැනට මේ කිසිවක් නොමැති බැවින් ක්‍රියාකාරී රජයක් ඉස්ලාමාබාද්හි නැතැයි එම ආර්ථික විශ්ලේෂකයන් පෙන්වා දී ඇත.
බ්‍රහස්පතින්දා නිකුත් කරනු ලැබූ නවතම සංඛ්‍යාවලින් පෙන්නුම් කරන පරිදි පාකිස්තානයේ රාජ්‍ය බැංකුවේ (SBP) විදේශ විනිමය සංචිත ඩොලර් බිලියන 11 දක්වා තවදුරටත් පහත වැටී තිබේ.
නිල දත්ත පෙන්නුම් කරන පරිදි 2021 අගෝස්තු මාසයේදී එරට රාජ්‍ය බැංකුව සතු විදේශ විනිමය සංචිතය ඩොලර් බිලියන 20.073 ක් වූ නමුත් 2022 මාර්තු 25 වන දින වන විට එය ඩොලර් බිලියන 12.04 දක්වා අඩු වූ අතර ඒ අනුව මාස නවයක් තුළ පමණක් ඩොලර් බිලියන 8 ක පහත වැටීමක් සිදුව ඇත.
