ආර්ථික දුෂ්කරතාවලට මුහුණදී සිටින මෙරට ගොවීන්ට සහයවීමට සහ අවදානම් කාණ්ඩයේ ළමයින්ට ආහාර ලබාදීම සඳහා නවසීලන්ත ඩොලර් 500,000ක මූල්‍යාධාරයක් පිරිනමන බව එරට විදේශ අමාත්‍යාංශය නිවේදනය කළා.
නවසීලන්ත විදේශ අමාත්‍යවරිය වන නනයියා මහුටා ට්විටර් පණිවුඩයක් නිකුත් කරමින් සටහන් කළේ එම මූල්‍යාධාරය ලෝක ආහාර වැඩසටහන සහ එක්සත් ජාතීන්ගේ ආහාර සහ කෘෂිකර්ම සංවිධානය හරහා ශ්‍රී ලංකාවට ලබාදෙන බවයි.
මෙමගින් ශ්‍රී ලංකාව සහ නවසීලන්තය අතර වසර 30 කට අධික කාලයක් පවතින සහයෝගිතාව තවදුරටත් ශක්තිමත් වන බවත්, එම කාලය තුළ නවසීලන්තය විසින් ශ්‍රී ලංකාවට නවසීලන්ත ඩොලර් මිලියන 25.07ක සංවර්ධන ආධාර ලබා දී ඇති බවත් ඇය සිහිපත් කළා.
මේ අතර ඉන්දීය රජය විසින් ශ්‍රී ලංකාවට යූරියා පොහොර මෙට්‍රික් ටොන් 65,000ක පොහොර සැපයීමට තීරණය කර තිබෙනවා.
එම පොහොර තොගය ලබා දෙනු ලබන්නේ ඉන්දීය රජය විසින් ශ්‍රී ලංකාවට ලබා දුන් ඩොලර් බිලියන එකක ණය යටතේයි.
මෙම යූරියා පොහොර තොගය ඉදිරියේ දී යල කන්නයේ වගා කටයුතු සඳහා යෙදවීමට නියමිතයි.
