බෝම්බ කිහිපයක් අටවා ඇති බවට නාඳුනන පුද්ගලයෙකු විසින් නේපාලයේ කත්මන්ඩු ගුවන්තොටුපළට දුරකතන ඇමතුමක් ලබාදී ඇත්තේ පකිස්තානයේ සිට බව අනාවරණය වී තිබේ.
මෙම දුරකතන ඇමතුම හේතුවෙන් බලධාරීන් විසින් මැයි 04 වන දා කත්මණ්ඩු ත්‍රිභුවන් ජ්‍යාත්‍යන්තර ගුවන් තොටුපළ පැය කිහිපයකට වසා දැමූ අතර සෝදිසි මෙහෙයුමක් ද කරනු ලැබීය.
නේපාල ගුවන් තොටුපළ බලධාරීන් පවසන ආකාරයට කත්මණ්ඩු භීතියට පත් කළ මෙම ව්‍යාජ බෝම්බ තර්ජන ඇමතුම ලැබී ඇත්තේ පාකිස්තානයෙනි.
පළමු ඇමතුමෙන් පැය දෙකක් ඇතුළත පර්යන්තය තුළ බෝම්බ පිපිරීමක් සිදුවිය හැකි බවට අනතුරු අඟවා පර්යන්ත රාජකාරී කාර්යාලය (TDO) වෙත ඇමතුම් දෙකක් ලැබුණු බව බලධාරීහු පවසති.
දේශිය වේලාවෙන් පළමු වරට උදෑසන 9:40 ට ලැබුණු ඇමතුමෙන් පසුව පසුව ජාත්‍යන්තර අංකයකින් තවත් ඇමතුමක් ලබාගෙන ඇතැයි වාර්තා වේ.
අභ්‍යන්තර පර්යන්තය තුළ බෝම්බ 6-7 අතර සංඛ්‍යාවක් සවිකර ඇති බවත් පැය දෙකක් ඇතුළත එය පිපිරෙන බවත් පවසමින් එම පුද්ගලයාම දෙවැනි ඇමතුම ලබාදුන් බවත් පැවසේ.
ඒ අනුව ගුවන්තොටුපළ බලධාරීන් ආරක්‍ෂක අංශවලට දැනුම් දී පර්යන්තයේ සියලුම ප්‍රදේශ බෝම්බ නිෂ්ක්‍රිය කිරීමේ කණ්ඩායම් යොදවමින් හොඳින් පරීක්‍ෂා කිරීමට කටයුතු කරන ලදී.
සියලුම ප්‍රදේශ සෝදිසි කර සොයා බැලූ නමුත් කිසිවක් සොයා ගැනීමට නොහැකි වූ අතර පෙරවරු 11:10 සිට ගුවන් තොටුපළ නැවත ක්‍රියාත්මක කිරීමට බලධාරීන් විසින් පියවර ගැණිනි.
ඇමතුම්කරු “Salam Walekum” කියමින් සංවාදය ආරම්භ කරමින් බලධාරීන්ට අවවාද කරනු ලැබූ බවත් එම පුද්ගලයා නේපාල භාෂාවෙන් කතා කළ පිරිමි අයෙකු බවත් හඳුනාගෙන තිබේ.
