වැඩ බලන ජනාධිපති ධුරයේ අද (15) දිනයේ දිවුරුම් දුන් රනිල් වික්‍රමසිංහ මේ මෙහොතෙම ඉල්ලා අස්විය යුතු බව අන්තර් විශ්වවිද්‍යාලීය ශිෂ්‍ය බල මණ්ඩලයේ කැඳවුම්කරු වසන්ත මුදලිගේ පවසනවා.
ඒ අද කැඳවා තිබූ විශේෂ මාධ්‍ය හමුවක් අමතමින්.
ගෝඨාභය රාජපක්ෂ ඉල්ලා අස්වූවා නොව ඔහුව ජනතාව එක්වී ඉවත් කළ බවත් එය ඓතිහාසික ජයග්‍රහණයක් බවත් සිහිපත් කරන ඔහු වැඩිදුරටත් පවසන්නේ බලය ඇත්තේ ජනතාව තුල බවත් සටන් කර දිනිය හැකි බව ඉන් මනාව පෙනී ගිය බවත් ය.
” විධායක ජනාධිපති කෙනෙක් කොහොමද එලවන්නේ, එහෙම යයිද කියලා ඇතැම් පාර්ශව කිව්වා ඒ වගේම තවත් සමහරු කිව්වා අරගලයට නායකත්වයක් නෑ, වැඩපිළිවෙලක් නෑ කියලා. හැබැයි මේ හැමදේටම මේ රටේ ජනතාව මේ වෙනකොට උත්තර දීලා තියෙනවා. රනිල්ට පාර්ලිමේන්තු එන්නවත් ජනමතයක් නෑ. පස්ස දෙරින් පාර්ලිමේන්තුවට ආපු රනිල් දැන් ජනාධිපති පුටුවෙ වාඩි වෙලා ඉන්නවා. රනිල් දිවුරුම් දීලා අපිට කියනවා ප්‍රජාතන්ත්‍රවාදය රකින්නලු. ප්‍රජාතන්ත්‍රවාදය කියන්නේ බහුතරයේ කැමැත්ත නම් කෝ රනිල්ට බහුතරයේ කැමැත්ත? මේක තනි දේශපාලන ගේම් එකක්. මිනිස්සු ගෝඨාභයට වගේම රනිල්ටත් ගෙදර යන්න කිව්වා. රනිල් මොකක්ද දැණ් ජනාධිපති පුටුවෙ කරන්නේ? පොහොට්ටුවෙ මන්ත්‍රීවරු ටිකක් සූදානම් වෙනවලු රනිල්ව දිගටම ජනාධිපති ධුරයේ තියන් ඉන්න. එහෙම හැදුවොත් මේ රටේ ජනතාව ඒවට උත්තර දෙයි. එවට උත්තර අපි ඉදිරි දවස් කිහිපයේදී දෙන්නම්. අපි කියනවා රනිල් මේ මොහොතෙම ඉල්ලා අස්වෙන්න ඕනෙ කියලා.”
