ශ්‍රී ලංකා ගුවන් හමුදාවේ මඩකලපු කඳවුරට අනුයුක්තව සේවය කරනු ලැබූ කෝප්‍රල් රත්නසූරිය එම්.වයි.ජී.ආර්.එම්.එල්.පී යන අය වාලච්චේන, රිදීතැන්න ප්‍රදේශයේදී ගසක බැඳ තිබෙන පුවතක් සමාජ මාධ්‍ය හරහා සංසරණය වී තිබුණා.
එහිදී කියැවුණේ දේශපාලකයින් රකින නිසාවෙන් කිසියම් පිරිසක් එම ගුවන් හමුදා භටයාව පැහැරගෙන ගොස් ගසක බැද මෙලෙස වඳහිංසාවට ලක්කර ඇති බවයි.
මේ පිළිබදව නිවේදනයක් නිකුත් කරකමින් ශ්‍රී ලංකා ගුවන් හමුදා මූලස්ථානය පවසන්නේ අදාළ ගුවන් හමුදා භටයාව ගසක බැඳ තිබියදී ඊයේ (28) උදෑසන ප්‍රදේශවාසීන් විසින් මුදාගෙන පොලීසියට දැනුම්දීමෙන් අනතුරුව රෝහල් ගත කර ඇති පුවත සත්‍යක් බවයි.
ඔහුව ගස් බැඳ තිබූ ස්ථානයේ දෙමළ භාෂාවෙන් ලියන ලද පුවරුවක සටහන් කර ඇත්තේ “කෘෘර දේශපාලනයට උදව් කරන ගැත්තන් මේ විදියට තමයි මරණයට පත්කරන්නේ ” යනුවෙනි.
පසුව වාලච්චේන පොලීසිය මගින් මේ පිළිබදව විමර්ශනයක් ආරම්භ කර ඇති අතර එහිදී ඔහු පවසා ඇත්තේ නිවාඩු ගොස් ආපසු එමින් සිටියදී කිසියම් පිරිසක් තමන්ව වෑන් රථයකින් පැහැරගෙන ගොස් අත් පා ගැට ගසා ගසක බැඳ පහරදී මරාදමන්නට උත්සහ කළ බවයි.
කෙසේවෙතත් ඔහුගේ ප්‍රකාශය හා සිදුවීම් අතර පරස්පරතා පවතින බැවින් පොලීසිය විසින් සිදුකරන ලද වැඩිදුර විමර්ශනයන්හීදී අනාවරණය වී ඇත්තේ අදාළ දෙමළ පුවරුව ලියා ඇත්තේ දෙමළ භාෂාව පිළිබදව පරිචයක් නොමැති පුද්ගලයෙකු බවයි.
ඉන් අනතුරුව සිදුකරන ලද ප්‍රශ්න කිරීම්වලදී කෝප්‍රල්වරයා මෙම ක්‍රියාව තමන් විසින්ම සිදුකරන ලද්දක් බවට අවසානයේදී පිළිගෙන තිබෙනවා.
ඒ අනුව මෙම ගුවන් හමුදා කෝප්‍රල්වරයා අන්තර්ජාල පරිගණක සූදූ ක්‍රීඩා සඳහා දැඩිලෙස ඇබ්බැහිවී සිටින පුද්ගලයෙකු බවත් එම ක්‍රීඩා සඳහා යෙදවීම සඳහා විටින් විට තම කදවුරේ සහෝදර ගුවන් භටයින්ගෙන් මුදල් ලබාගෙන ඇති බවත් අනාවරණය වූ බව පොලීසිය සදහන් කරනවා.
නැවත එම මුදල් ලබාදීමට ඔහුට නොහැකි නිසාවෙන් ඔහු සියදිවි නසාගැනීමට සූදානම්ව ඇතත් සියදිවි නසාගතහොත් තමන්ගේ බිරිදට ගුවන් හමුදාවෙන් ලැබෙන දීමනා නොලැබෙන බැවින් මෙවැනි ක්‍රියාවක් සැලසුම් කළ බවට කෝප්‍රල්වරයා පාපොච්චාරණය කර තිබෙනවා.
ගුවන් හමුදාව නිවේදනය කරන්නේ මෙම ක්‍රියාව සඳහා ශ්‍රී ලංකා ගුවන් හමුදාවේ කිසිදු පාර්ශවයක් සම්බන්ධ නොමැති බවත්, එය සම්පූර්ණයෙන්ම මෙම ගුවන් භටයාගේ ක්‍රියාවක් පමණක් වන බවත්ය.
මේ වන විට මෙම කෝප්‍රල්වරයා වාලච්චේන පොලීසිය මගින් අත්අඩංගුවට ගෙන අද දිනයේ මහේස්ත්‍රාත් අධිකරණයට ඉදිරිපත් කිරීමට නියමිත බව ගුවන් හමුදාව නිවේදනය කරනවා.
