චීනය සමග පවතින අර්බුදය හමුවේ ඉදිරියේදී සිය රටට ජෛව විද්‍යාත්මක හෝ වෛරස් ප්‍රහාරයක් එල්ල වනු ඇති බවට තායිවානය සැකපළ කරයි.
එබැවින් තායිවානයේ කොවිඩ් රෙගුලාසි දැඩි කිරීමට තීරණය කර ඇත.
ඒ ලොව බොහෝ රටවල් කොරෝනා වෛරසය හේතුවෙන් වසර දෙකකට අධික කාලයක් පුරාවට පවත්වාගෙන ගිය කොවිඩ් රෙගුලාසි ලිහිල කරමින් සිටින පසුබිමක් තුලයි.
අමෙරිකානු කතානායිකා නැන්සි පෙලොසි ගේ තායිවාන සංචාරයෙන් පසුව චීනය මේ වන විට තායිවාන දේශ සීමාව ආසන්න මුහුදේ සහ අහසේ යුද අභ්‍යාසවල නිරතවීම හරහා සිය බලය විදහා පාමින් සිටී.
කෙසේ වුවත් තායිවානය සැකපළ කර සිටින්නේ කුමන අවස්ථාවක හෝ සිය රට ඉලක්ක කර ගනිමින් චීනය වෛරස් හෝ ජීව විද්‍යාත්මක ප්‍රහාරයක් එල්ල කරනු ඇති බවයි.
මේ හේතුවෙන් තායිවානය විසින් වෛරසයන් ඇතුල්වීම වළක්වාලීම සඳහා පහත දැක්වෙන ක්‍රියා මාර්ග ගෙන ඇත.
- පිටතින් පැමිණෙන කිසිදු පුද්ගලයෙකුට ආහාර පාන රැගෙන ඒම තහනම් කිරීම.
- තායිවානයට පැමිණෙන පුද්ගලයින් එරට රජය විසින් නම් කරනු ලබන හෝටල් තුළ දින 03ක කාලයක් නිරෝධායනය වීම.
- එලෙස පැමිණෙන පුද්ගලයින් ජෛව සාම්පල් පටල පරීක්ෂණ සඳහා ලබා ගැනීම සහ ඔවුන්ගේ සෞඛ්‍ය තත්ත්වය පිළිබඳ සම්පුර්ණ වාර්තාවක් ලබා දිය යුතුවීම.
- තායිවානයට ඇතුල්වන පුද්ගලයින් එරට භාවිතයට ගැනෙන සිම් කාඩ්පතක් භාවිතා කිරිම අනිවාර්ය වේ.
- තායිවානයේ පිහිටි ජාත්‍යන්තර ගුවන් තොටුපොළවල් ආශ්‍රිතව නිරෝධායන බස් රථ සහ කුලී රථ පහසුකම් පවත්වාගෙන යෑම.
මේ අතර තායිවානය විසින් ඉකුත් වසරේදී සිය හමුදාවන් යොදා ගනිමින් හදිසි රසායනික ප්‍රහාරයක් හෝ ජීව විද්‍යාත්මක වෛරස් ප්‍රහාරයකට මුහුණ දිය යුතු ආකාරය පිලිබඳ පෙරහුරුවක් ද පවත්වා ඇතැයි වාර්තා වෙයි.
