ශ්‍රී ජයවර්ධනපුර කෝට්ටේ මහ නගර සභාවේ සෞඛ්‍ය වෛද්‍ය නිලධාරී අංශය විසින් බළල් අසූචි සහිත මිනිස් පරිභෝජනයට නො සුදුසු ආහාර අලෙවි කරමින් පවත්වාගෙන ගිය වෙළෙඳසැල් තිහක් වටලා, නඩු පැවරීමට කටයුතු කර තිබෙනවා.
ඒ, ඉකුත් 28 වැනි දා අදාල ප්‍රදේශයේ මහ ජනතාවගේ සෞඛ්‍ය තත්ත්වය පරික්ෂා කිරීමේ අරමුණින් කළ වැටලීමක දීයි.
ඒ අනුව, ඔවුන්ට එරෙහිව නඩු පැවරීමට කටයුතු කර ඇති අතර අදාල පියවර ගෙන ඇත්තේ, 1980 අංක 26 දරණ ආහාර පනතේ 32 වගන්තිය ප්‍රකාරව සාදන ලද 2011 ආහාර ස්වස්ථතා නියෝග කඩ කිරීම යටතේයි.
මෙම වැටලීම යටතේ දී අදාල පනත උල්ලංගණය කිරීමේ චෝදනාව ලද සැකකරුවන් කොළඹ අලුත්කඩේ සහ ගංගොඩවිල අධිකරණයට ඉදිරිපත් කිරීමට කටයුතු කර තිබෙනවා. ඒ අනුව, වරදේ ස්වභාවය මත රුපියල් පන්දහස, දහදහස සහ පහළොස් දහස වන පරිදි රුපියල් 82,500 ක දඩ මුදලක් වෙන් වෙන් වශයෙන් ඔවුන්ට නියම කර තිබෙනවා.
මේ අතර මෙම වැටලීමේ දී ඇතැම් වෙළෙඳ සැල්වල පිසූ ආහාර සමඟ මස් මාළු ශීතකරණවල ගබඩා කිරීම, මැසි මදුරුවන්ට වැසිය හැකි ආකාරයට වෙළෙඳසැල්වල ආහාර නිරාවරණය කර තිබෙනු සෞඛ්‍ය වෛද්‍ය නිලධාරීන්ට නිරීක්ෂණය වී තිබෙනවා.
