ජනාධිපතිවරයා අද (23) කළුතර දිස්ත්‍රික්කයේ වලල්ලාවිට ප්‍රාදේශිය ලේකම් කොට්ඨාසය කේන්ද්‍ර කරගනිමින් පැවැති “ගම සමග පිළිසඳර” වැඩසටහනට එක්විය.
ගම සමග පිළිසඳර 7 වැනි අදියර යටතේ වලල්ලාවිට යට්ටපාත ගම්මානයේ ජනතාව සමග සුහද පිළිසඳරක නිරතවීමෙන් අනතුරුව ජනාධිපතිවරයා වලල්ලාවිට යට්ටපාත කණිෂ්ඨ විද්‍යාලයට පැමිණ ජනතාව ඇමතීමට කටයුතු කරන ලදි.
එහිදී කොළඹ වරායේ නැගෙනහිර පර්යන්තය සම්බන්ධව අදහස් දක්වමින් ඒ මහතා ප්‍රකාශ කර සිටියේ මේ අවස්ථාවේ සිදුවන විරෝධතාවයට තමන්ට පත්වීමට උපකාරී වූ ස්වාමීන්වහන්සේලා පවා සහභාගී වී ඇති බව තමන් දන්නා බවත් මෙය ඉන්දීය ආයෝජනයක් පමණක් බවත් ය.
එමෙන්ම රේගුව සඳහා හමුදා නිලධාරියෙකු පත් කළද රේගුවේ පාලනය තමන්ට අවශ්‍ය ලෙස සිදු නොවන බවත් තමන් ඉදිරියේදී දරුණු තීරණ ගන්නා අතර රේගුවේ සියලුම නිලධාරීන්ව එලියට දැමීමට පවා තමන් සූදානම් බවත් දැඩි ලෙස අවධාරණය කර සිටියා.
ප්‍රතිඅපනයන 66%කටම දායක වන්නේ ඉන්දියාව බැවින් නැගෙනහිර පර්යන්තය සංවර්ධනයෙන් සපුරා ගැනීමට අපේක්ෂා කරන ව්‍යාපාරික කාර්යය අවබෝධ කොටගෙන ඉදිරි පියවර සැලසුම් කළයුතු බවත් ඔහු පවසනවා.
එමෙන්ම, ආයෝජන වැඩසටහන යටතේ පර්යන්තයේ පරිපාලනය සහ 51%ක කොටස් හිමිකම ශ්‍රී ලංකා වරාය අධිකාරියට හිමි වන බවත් ඉතිරි 49%ක කොටස් ආයෝජනයට ඉන්දියාව, ජපානය හා ශ්‍රී ලංකාවේ සමාගම් කිහිපයක් ඉදිරිපත්ව සිටින බවත් ඔහු පෙන්වා දෙනවා..
