සෞඛ්‍ය අංශ දැනුම්වත් කිරීමකින් තොරව පසුගිය 20 වනදා මාතර කාලිදාස පාරේ පිහිටි උත්සව ශාලාවක සහ 22 වනදා නාවිමන ප්‍රදේශයේ නිවසක විවාහ උත්සවයක් පවත්වා ඇත.
ජනවාරි මස 27 වනදා මෙම විවාහ උත්සවයේ මනමාල මහතා විසින් පුද්ගලික රෝහලකින් සිදුකර ගන්නා ලද රැපිඩ් ඇන්ටිජන් පරීක්ෂාවකින් ඔහු ආසාදිතයෙකු බවට තහවුරුව ඇත.
ඒ අනුව විවාහ මංගල්‍යයට සහභාගිවූ පිරිස හඳුනා ගැනීමට කැකණදුර සෞඛ්‍ය වෛද්‍ය නිළධාරී කාර්යාලයේ මහජන සෞඛ්‍ය පරීක්ෂකවරු විසින් පියවර ගෙන ඇත.
එලෙස හඳුනාගත් පවුල් 82ක පුද්ගලයින් 139 දෙනෙකු නිරෝධායනයට ලක්කර ඇත.
එම පිරිසෙන් 105 දෙනෙකුගේ PCR සාම්පල පෙබරවාරි 01 වනදා ලබාගෙන ඇති අතර එම පරීක්ෂණ වාර්තාව ඊයේ (05) දින ලැබී ඇත.
එම වාර්තාව අනුව පුද්ගලයින් 34 දෙනෙකු ආසාදිතයින් ලෙස හදුනාගෙන ඇත.
මෙලෙස ආසාදනයවූ පිරිස වාර්තාවී ඇත්තේ තල්පවිල හා නාවිමන ප්‍රදේශවලින්.
මෙම ආසාදිතයින් අතර කාන්තාවන් 12 දෙනෙකු සහ පුරුෂයන් 22 දෙනෙකු ඇති අතර ඔවුන් වැඩිදුර ප්‍රතිකාර සඳහා ලැබීම නව රෝහලට සහ හම්බන්තොට රෝහලට යොමු කරන ලදී.
