මැතිවරණ කොමිසමේ සාමාජිකයන් ඉදිරි දිනවලදී කැඳවා සාකච්ඡා කිරීමට සූදානම් බව අග්‍රාමාත්‍ය දිනේෂ් ගුණවර්ධන මහතා පවසනවා.
පළාත් පාලන ඡන්දය පැවැත්වීමට මුදල් ලබා දීම ගැන විපක්ෂ නායක සජිත් ප්‍රේමදාස මහතා ඊයේ (24) පාර්ලිමේන්තුවේදී විමසූ ප්‍රශ්නයකට පිළිතුරු දෙමින් අග්‍රාමාත්‍යවරයා මේ බව ප්‍රකාශ කර තිබෙනවා.
අවුරුද්දට පෙර රජයේ සේවකයන්ට ගෙවිය යුතු වැටුප් දෙක ලැබෙන ආධාරවලින් හෝ ගෙවන බවයි අගමැතිවරයා එහිදී සඳහන් කළේ.
“මේ ගැන ශ්‍රේෂ්ඨාධිකරණයේ නඩු විභාග කිහිපයක් තිබෙනවා. විරුද්ධ පක්ෂ නායකතුමා සඳහන් කළ පරිදි මද්දුම බණ්ඩාර මහතාත්, නඩු කිහිපයක් ඉදිරිපත් කර තිබෙනවා. ලංකාවේ ශ්‍රේෂ්ඨාධිකරණයට භාණ්ඩාගාර ලේකම්තුමා විසින් කරුණු ඉදිරිපත් කරලා තිබෙනවා. මැතිවරණ කොමිසමත් කරුණු ඉදිරිපත් කරලා තිබෙනවා. එම තීරණ අනුව කටයුතු කරාවි. මට කියන්න තිබෙන්නේ එපමණයි. අධිකරණයේ පවතින කරුණු ගැන මම සාකච්ඡා කරන්නේ නෑ.
අපි නොවෙයිනේ උසාවි ගියේ. උසාවි ගිහිල්ලා තියෙන්නේ තමුන්නාන්සේලා සහ මැතිවරණ කොමිසමයි. උසාවියට ගිහිල්ලා පැමිණිලි කරලා තියෙන්නේ. ශ්‍රේෂ්ඨාධිකරණය කියන්නේ ලංකාවේ ඉහළ ම අර්ථ නිරූපණ දෙන අධිකරණ ය. ඉතින් මේ පිළිබඳව ඊයෙත් මැතිවරණ කොමිසම ප්‍රකාශයක් කර තියෙනවා. ඒකත් අවසානයක් නැති ප්‍රකාශයක්. මම අමාත්‍යවරයා හැටියට ඒ අය කැඳවන්න බලාපොරොත්තු වෙනවා.
දැන් මොකද ඒ අය අවිනිශ්චිතව කටයුතු කිරීම ගැන එක පැත්තකින් මට අධිකරණයට ඇඟිලි ගහන්න බෑ. නමුත් කොමිසම කැඳෙව්වා ම කියනවා කොමිසමට බලපෑමක් කරනවා කියලා. මේ සභාවෙ ම ප්‍රකාශ කළා. මම ඉතාම ඕනෑකමින් වගකීමෙන් ප්‍රකාශ කරන්නේ කොමිසමේ සියලු දෙනා එයි ද කියන්න මම දන්නේ නෑ. මම ඉදිරි දවස්වල කැඳවලා සාකච්ඡා කරන්න බලාපොරොත්තු වෙනවා.
නීතිය අනුව තමයි 19 වැනිදා ලංකාවෙම පළාත් පාලන ආයතන විසුරුවා හැරියේ. ඉතිං ඒ නීතිය අනුව අපි කටයුතු කරගෙන යනවා. පළාත් පාලන ආයතන විසින් සිදුවිය යුතු සේවාව මහ ජනයාට අවශ්‍ය සේවාව පවත්වා ගෙන යන්න.
මූල්‍යමය ගැටලු රටම මුහුණ දෙන ප්‍රශ්නයක්. මමත්, ජනාධිපතිතුමත් බරපතළ ලෙස වගකීමෙන් කිව්වා අපි මුහුණ දෙනවා. කොහොම හරි සෑම රාජ්‍ය සේවකයෙක්ගෙම වැටුප් දෙසරයක් ගෙවන්න තිබෙනවා.
අවුරුද්දට පෙර පළමුව මේවා ඉටු කිරීමෙන් තමයි ඊළඟ කටයුත්තට යන්නේ. අපේ ගොවි ජනතාව දෙන්න තියෙන විශේෂ ගෙවීම් රාශියක් තියෙනවා. අපිට හොඳ අස්වැන්නක් ලබා දුන්නා. ඉතිං ඒවා ගැනත් කල්පනා කරමින් මේ කටයුත්තේ අපි නිරත වෙනවා කිසිම කෙනෙක්ගේ අයිතිවාසිකම් අපි උදුරා ගන්නේ නෑ.”
