විවාහ මංගල්‍යයකදී උපරිම අමුත්තන් සංඛ්‍යාව 150 සිට 50 දක්වා සංශෝධනය කිරීමේ යෝජනාව අත්හිටුවා තිබෙනවා.
මංගල උත්සවයක් යනු කොවිඩ් 19 පැතිරීමට වැඩි ඉඩකඩක් තිබෙන ස්ථානයක් ලෙස හදුනාගැනීම නිසාවෙන් එවැනි උත්සවයකට සහභාගීවන සංඛ්‍යාව 50 දක්වා අඩු කිරීමට මීට පෙර සෞඛ්‍ය අංශ තීරණය කර තිබුණා.
කෙසේ වෙතත්, මෝනින් පුවත්පත වාර්තා කරන්නේ විවාහ මංගල්‍ය සඳහා උපරිම අමුත්තන් සංඛ්‍යාව 150 සීමාව නොවෙනස්ව පවතින බව ප්‍රාථමික සෞඛ්‍ය සේවා, වසංගත හා කොවිඩ් රෝග පාලන රාජ්‍ය අමාත්‍ය වෛද්‍ය සුදර්ශනී ප්‍රනාන්දු පුල්ලේ මහත්මිය සදහන් කළබවයි.
විවාහ කර්මාන්තය මත දැඩි ලෙස රඳා පවතින බොහෝ වෘත්තීය කණ්ඩායම් විසින් කරන ලද ඉල්ලීම් ගණනාවක් හේතුවෙන් අමුත්තන් 50 සීමාව ඉවත්කිරිමට කටයුතු කල බව රාජ්‍ය අමාත්‍ය ප්‍රනාන්දු පුල්ලේ මහත්මිය පවසා තිබෙනවා.
ඒ අනුව ඔවුන්ගේ ජීවනෝපායන් සඳහා වන ඉල්ලීම් හා බලපෑම් සැලකිල්ලට ගනිමින් මංගල උත්සවයකදී උපරිම අමුත්තන් සංශෝධනය නොකිරීමට රජය තීරණය කර ඇති බව රාජ්‍ය අමාත්‍යවරිය සදහන් කර තිබෙනවා.
කෙසේ වෙතත්, අදාල තීරණය ඕනෑම වේලාවක වෙනස් කිරීමට යටත් වන බවද රාජ්‍ය අමාත්‍යවරිය පැවසූ බවයි පුවත්පත වාර්තා කරන්නේ.
