දෙමටගොඩදී තරුණයෙකු පැහැරගෙන ගොස් පහරදුන් සිද්ධියේ, නඩුවට පෙනී නොසිටීම හේතුවෙන් හිරුණිකා ප්‍රේමචන්ද්‍ර අත්අඩංගුවට ගෙන අධිකරණයට ඉදිරිපත් කරන ලෙස, කොළඹ මහාධිකරණය අද (10) දහවල් පොලීසියට නියෝග කළා.
කෙසේ වෙතත් සිය මාස එකහමාරක් වයසැති බිළිදියට කිරිදීම සදහා හිරුණිකා ප්‍රේමචන්ද්‍ර මහත්මියගේ රථයේ රැදී සිටිම හේතුවෙන් අධිකරණයට ඉදිරිපත්වීමට ප්‍රමාද වී ඇති බව ඇයගේ නීතීඥවරිය අධිකරණයට දැනුම්දීමෙන් පසුව අදාල වරෙන්තුව අවලංගු කිරීමට අමල් රණරාජා විනිසුරුවරයා කටයුතු කළා.
මෙම නඩුවට අදාලව මීට පෙර කිසිදු අවස්ථාවක අධිකරණය මඟහැර නොතිබීමේ කරුණද මෙහිදී විනිසුරුවරයා සැළකිල්ලට ගෙන තිබෙනවා.
මේ අතර අදාල සිදුවීම සම්බන්දයෙන් සිය නිල ෆේස්බුක් ගිණුමේ සටහනක් තබමින් හිරුණිකා ප්‍රේමචන්ද්‍ර මහත්මිය මවක ලෙස අධිකරණ අමාත්‍ය මොහොමඩ් අලි සබ්රි මහතාගෙන් ඉල්ලීමක් කර තිබෙනවා.
අදාල සටහනින් ඇය පෙන්වා දී ඇත්තේ අධිකරණ කටයුත්තක් සදහා පැමිණෙන මවකට තම දරුවා තබාගැනීමට, දරුවාට කිරි දීමට හො දරුවාගේ කටයුතු සිදුකරගැනීමට සුදුසු ස්ථානයක් නොමැති බැවින් කාන්තාවන් දැඩිලෙස අපහසුතාවයට පත්වන බවයි.
එම නිසා අධිකරණය තුළ ඕනෑම කටයුත්තක් සඳහා සහභාගීවන කුඩා දරුවන් රැගෙන එන මව්වරුන් වෙනුවෙන් යම් ස්ථානයක් වෙන් කර දීමට කටයුතු කරන මෙන් ඇය අධිකරණ අමාත්‍යවරයාගෙන් ඉල්ලා සිටිනවා.
