මිනිස් පරිභෝජනයට නුසුදුසු බවට සැක කෙරෙන පොල්තෙල් අඩංගු කන්ටේනරයක් දඹුල්ලේදී පොලිස් භාරයට ගෙන තිබෙනවා.
පොලිස් මාධ්‍ය ප්‍රකාශක නියෝජ්‍ය පොලිස්පති අජිත් රෝහණ මහතා පැවසුවේ, පොලීසියට ලද තොරතුරක් මත මෙම පොල් තෙල් කන්ටේනරය පොලිස් භාරයට ගෙන ඇති බවයි.
ඒ අනුව දඹුල්ල ආර්ථික මධ්‍යස්ථානයේ පිටුපස පෞද්ගලික ගබඩාවක් තුළ නවතා තිබු අදාල සැකකටයුතු පොල් තෙල් අඩංගු කන්ටේනරය දඹුල්ල පොලීස් භාරයට ගෙන තිබෙනවා.
දඹුල්ල නගරාධිපති ජාලිය ඕපාත මහතා සඳහන් කරන්නේ අදාළ පොල් තෙල් තොගය ප්‍රවාහනය කිරීමට හෝ ඒවා ගබඩා කිරීමට ලබාදුන් නීත්‍යානුකූල අවසරයක් පත්‍රයක් හෝ කිසිදු ලියකියවිල්ලක් මෙම පුද්ගලයන් සතුව නොමැති බවයි.
මීට පෙර අවස්ථාවකදී දංකොටුව ප්‍රදේශයේ තිබී මෙලෙසම සැක කටයුතු පොල්තෙල් බවුසර් දෙකක් පොලිස් භාරයට ගැනුණා.
