පවත්නා කොවිඩ් 19 අර්බුදය හමුවේ නුවරඑළිය නගර සභාවෙන් විශාල ජනසහභාගීත්වයකින් යුක්තව ඊයේ (25) දිනයේ අවුරුදු උත්සවයක් පවත්වා තිබෙනවා.
මෙම අවුරුදු උත්සවය සඳහා ප්‍රදේශවාසීන් මෙන්ම දේශීය සංචාරකයන්ද සහභාගීවී ඇති බවයි වාර්තාවන්නේ.
නුවරඑළිය නගරාධිපති චන්දන ලාල් කරුණාරත්න මහතාගේ ප්‍රධානත්වයෙන් පැවති මෙම අවුරුදු උත්සවයට සහභාගීවූවන් හට දිවා ආහාරය සමග ගල් අරක්කු කාලක්ද ලබාදී ඇතිබවට තොරතුරු වාර්තාවනවා.
එයට සහාගීවූ පිරිසද කිසිදු නිරෝධායන නීතියක් අනුගමනය නොකර අවම තරමේ මුව ආවරණය හෝ නිසිපරිදි නොපැලඳ උත්සවශ්‍රීයෙන් ඇලලී ගිය ආකාරයක් දක්නට ලැබෙනවා.
රජය මගින් සියලු රාජ්‍ය හා පෞද්ගලික උත්සව තහනම් කර තිබියදී හා මහජනතාව එක්රැස්වන සැණකෙලි, එළිමහන් ප්‍රසංග හා උත්සව තහනම් කර තිබෙන තත්ත්වයකදී නුවරඑළිය නගරසභාව දිගින් දිගටම නිරෝධායන නීති උල්ලංඝණය කිරීම් දිනපතා වාර්තාවනවා.
පවතින කොවිඩ් අවදානම නොතකා සෞඛ්‍ය උපදෙස් කඩකරමින් පැවැති එම අවුරුදු උත්සවය පිළිබඳ වහාම පරීක්ෂණයක් පවත්වන ලෙස මධ්‍යම පළාත් පාලන කොමසාරිස්වරයාට තමන් උපදෙස් ලබාදුන් බව මධ්‍යම පළාත් ආණ්ඩුකාර ලලිත් යූ. ගමගේ මහතා පවසනවා.
