ජාතික ජන බලවේගයේ නායක අනුර කුමාර දිසානායක මහතා සහ සමගි ජන බලවේගයේ නායක සජිත් ප්‍රේමදාස මහතා අතර පැවැත්වීමට යෝජිත විවාදයට ලබන මැයි මාස 7, 9, 13 හෝ 14 යන දිනවලින් එකක් යොදා ගැනීමට සූදානම්ව බව පවසමින් ජාතික ජන බලවේගය විසින් සමගි ජන බලවේගය වෙත ලිපියක් යොමුකර තිබෙනවා.
ලිපියෙන් දැක්වුණේ එම විවාදයට නිශ්චිත දින නියම වීමක් මෙතෙක් නොවීම හේතුවෙන් ජනතාව අතර විවාදය සම්බන්ධව වැරදි අදහස් මතු වීමේ ඉඩක් ඇති බවත් යම් හෙයකින් සමගි ජන බලවේගය මෙම විවාදයට එකඟ නොවන්නේනම් ඒ බව කඩිනමින් දැනුම් දීමට කටයුතු කරන ලෙසයි.
මේ අතර අදාළ ලිපියට පිළිතුරු ලිපියක් බවට හැඟවෙන අයුරින් සජිත් ප්‍රේමදාස මහතාගේ ලිපි ශීර්ෂය යටතේ වන ලිපියක් සමාජ මාධ්‍යවල පලකර තිබෙනවා.
එහි දැක්වෙන්නේ තමන්ට ගෝලීය ව්‍යාපාරික උපායමාර්ගික සැලසුම්කරණ හමුවීම් කිහිපයක් ඇති බැවින් ජාතික ජනබලවේගය ලබාදී ඇති දින 04 තුළ මෙම විවාදය පැවැත්විය නොහැකි බවත් ජූනි මස 31 වැනි දින විවාදය පැවැත්වීමට තමන් සූදානම් බවත් සජිත් ප්‍රේමදාස මහතා පවසන බවයි.
කෙසේවෙතත් ජූනි මස 31 වැනිදාවක් නොමැති බැවින් අදාළ ලිපියෙහි සත්‍ය අසත්‍යභාවය පිළිබදව News19 ප්‍රවෘත්ති අංශය සමගි ජනබලවේගය පක්ෂයේ පාර්ලිමේන්තු මන්ත්‍රී නලීන් බණ්ඩාර මහතාගෙන් විමසීමක් කළා.
ඔහු පැවසුවේ එම ලිපිය ව්‍යාජ එකක් බවත් තවමත් ජාතික ජනබලවේගය යොමුකර ඇති ලිපිය සම්බන්ධයෙන් සාකච්ඡාවක් හෝ නොපවත්වා ඇති බවයි.
ඒ සම්බන්ධයෙන් අද (23) සවස සාකච්ඡා කිරීමෙන් අනතුරුව විවාදය සිදුකරන දිනය පිළිබදව මාධ්‍ය දැනුවත් කරන බවද ඔහු වැඩිදුරටත් පවසා සිටියා.
