කළුතර නාගොඩ රෝහලේ ප්‍රධාන දොරටුව අසල පොලිස් නිලධාරීන් සහ ආරක්ෂක නිලධාරීන් බලා සිටියදී රෝහලට පැමිණි කාන්තාවකට තියුණු ආයුධවලින් පහර දී තිබෙනවා.
පහරදීම සිදුකර ඇත්තේ කළුතර, වෙනිවැල්පිටිය ප්‍රදේශයේ මත්ද්‍රව්‍ය ජාවාරමේ නිරත මැර පිරිසක් බවට වාර්තා වනවා.
කළුතර, වෙනිවැල්පිටිය, වෙන්දේසි වත්ත ප්‍රදේශයේ නිවසකට ඊයේ (25) පස්වරුවේ පැමිණි පුද්ගලයින් කිහිපදෙනෙක් එහි සිටි තරුණයෙකුට පහර දී නිවසේ දේපළවලටත් හානි කර තිබෙනවා.
එම ප්‍රදේශයේ මත්ද්‍රව්‍ය ජාවාරමේ නිරත සුද්දා සහ රනේ නැමැති පුද්ගලයින් දෙදෙනෙකුට සහ ඔවුන්ගේ ආධාරකරුවන් කිහිපදෙනෙකුට මෙම පහරදීම සම්බන්ධයෙන් චෝදනා එල්ල වනවා.
එම නිවසේ තරුණයාට පහරදුන් පිරිස පසුව ඒ ආසන්නයේ ඇති තවත් නිවසකට ගොස් එහි සිටි තරුණයින් දෙදෙනෙකුට ද පහරදීමට තැත්කර තිබෙන අතර එම නිවසේ තරුණයින් දෙදෙනා ඒ අසල ඇති කැලයට පැනයමින් සිය ජීවිත බේරාගැනීමට සමත්ව තිබෙනවා.
මේ සම්බන්ධයෙන් කළුතර දකුණ පොලීසියට දුරකථනයෙන් දැනුම් දී ඇති අතර පසුව එහි පැමිණි නිලධාරීන් මැර පිරිස සමග කතාබස් කර පිටව ගිය බවට ඔහුන් චෝදනා එල්ල කරනවා.
අදාළ සිදුවිමට මුහුණදුන් කාන්තාවක් පවසා සිටියේ,
“මුළු ගේම කුඩුපට්ටම් කරලා සර් අපේ. අපේ තාත්තාගේ ෆොටෝ එක පවා කුඩු කරලා. වයසක මහත්තුරු දෙන්නෙක් එවලා තිබුණා දකුණු කළුතර පොලීසියෙන්. පොලීසියට මම සුද්ද සිංහලෙන් කිව්වා. සුද්දාගෙන් කසිප්පු බොනවා. සුද්දා අරක්කු දෙනවා. සුද්දා ළඟට ට්‍රැෆික් බයික්වල තෙල් ගහගෙන ගිහින් සුද්දා එක්ක තමා ගනුදෙනුව. ඌ බූරු ගහනවා. ජාවාරම් කරනවා. පොලීසිය එක්ක ඌ ඉන්නේ. අපි කොච්චර ඇන්ට්‍රි දාලා තියෙනවා ද? දකුණු කළුතර පොලීසියෙන් තාම පියවරක් අරන් නෑ. කොන්ද කෙලින් තියෙන එකෙක් නෑ සර් පොලීසියේ.”
මැර ප්‍රහාරයෙන් තුවාල ලැබූ තරුණයාගේ සුවදුක් විමසීම සඳහා නාගොඩ රෝහලට යමින් සිටි මවට නාගොඩ මංසන්ධියේදී ප්‍රහාරයක් එල්ල වී තිබෙනවා
ඉන් පලා ආ කාන්තාව නාගොඩ රෝහල තුළට ඇතුළු වීමට පෙර,පොලිස් නිලධාරීන් සහ ආරක්ෂක නිලධාරීන් බලා සිටියදී එහි පැමිණි මැර පිරිස ඇයට තියුණු ආයුධවලින් පහර දී තිබුණා.
ඉන් බරපතළ තුවාල ලැබූ කාන්තාව සහ නිවසේදී පහර කෑ ඇගේ පුත්‍රයාද මේ වනවිට නාගොඩ රෝහලේ ප්‍රතිකාර ලබනවා.
මේ සම්බන්ධයෙන් කළුතර දකුණ පොලිසියට චෝදනා එල්ල වන පසුබිමක සිද්ධියේ සැකකරුවෙක් වන ‘රනේ’ නැමැත්තා අද (26) දහවල් එම පොලීසිය මඟින්ම අත්අඩංගුවට ගෙන තිබෙනවා.
