චීන කොමියුනිස්ට් පක්ෂයේ ජාත්යන්තර කටයුතු දෙපාර්තමේන්තුවේ නියෝජ්ය අමාත්යවරයා ඇතුළු දූත පිරිසක් ජාතික ජන බලවේගයේ නායක අනුර කුමාර දිසානායක මහතා හමු වී තිබෙනවා.
අද (23) පෙරවරුවේ ජනතා විමුක්ති පෙරමුණ ප්රධාන කාර්යාලයේදී මෙම හමුව පැවැත්වුණා.
චීන දූත මණ්ඩලය වෙනුවෙන් මෙම හමුවට චීන කොමියුනිස්ට් පක්ෂයේ ජාත්යන්තර කටයුතු දෙපාර්තමේන්තුවේ නියෝජ්ය අමාත්ය හා එම පක්ෂයේ මධ්යම කාරක සභික සන් හයියන්, චීන කොමියුනිස්ට් පක්ෂයේ ජාත්යන්තර කටයුතු දෙපාර්තමේන්තුවේ නියෝජ්ය අධ්යක්ෂ ජනරාල් ලින් ටාඕ, ශ්රී ලංකාවේ චීන තානාපති කාර්යාලයේ කවුන්සලර් චින් ෂින්ග්යුයන්, චීන කොමියුනිස්ට් පක්ෂයේ ජාත්යන්තර කටයුතු දෙපාර්තමේන්තුවේ අධ්යක්ෂ ලී ජින්යන් ඇතුළු මහත්ම මහත්මීන් පිරිසක් සහභාගී වී තිබෙනවා.
එමෙන්ම, ජාතික ජන බලවේගය නියෝජනය කරමින් ජාතික විධාය සභිකයින් වන විජිත හේරත්, ආචාර්ය හරිනි අමරසූරිය, මහාචාර්ය අනිල් ජයන්ත ප්රනාන්දු සහ සුනිල් හඳුන්නෙත්ති යන මහත්ම මහත්මීන් ද මේ අවස්ථාවට එක්ව සිටි බවයි වාර්තා වෙන්නේ.
මෙම හමුවේදී වත්මන් දේශපාලන තත්වය, ඉදිරියේදී පැවැත්වීමට නියමිත මැතිවරණ සහ වර්ධනය විය හැකි දේශපාලන තත්වයන් පිළිබදව දෙපාර්ශ්වය අතර සාකච්ඡා කළ බව ජාතික ජනබලවේගයේ නායක අනුර කුමාර දිසානායක මහතා පවසනවා.
එමෙන්ම, මැතිවරණයක් සඳහා ජාතික ජන බලවේගයේ සූදානම මෙන්ම ඒ සඳහා අනුගමනය කිරීමට බලාපොරොත්තු වන ක්රියාමාර්ග පිළිබඳවත් නිර්මාණය වී ඇති අර්බුදකාරී තත්වයෙන් රට ගොඩගැනීම සඳහා මූලිකව දේශපාලන ස්ථාවරත්වයක් රට තුළ ඇති කිරීමේ වැදගත්කමත් මෙහිදී අවධාරණයට ලක් කළ බව ඔහු තවදුරටත් සඳහන් කර තිබෙනවා.