ජාතික රූපවාහිනියේ කුලියාපිටිය – උඩුබද්දාව වාර්තාකරු දිනෙත් කුමාර වාර්තාකරණයේ යෙදී සිටියදී පොලීසිය විසින් අත්අඩංගුවට ගෙන ජාතික ආරක්ෂාවට හානි කළ බවට චෝදනා නඟමින් අධිකරණයට ඉදිරිපත් කර රක්ෂිත බන්ධනාගාර ගත කර තිබෙනවා.
මේ පිළිබඳ නිවේදනයක් නිකුත් කරමින් මාධ්‍ය සේවක වෘත්තිය සමිති සම්මේලනය පවසන්නේ, දිනෙත් කුමාර පසුගිය නොවැම්බර් 30 උදෑසන බිංගිරිය පොලීසිය අසල ප්‍රධාන මාර්ගයේ රූගත කරමින් සිටියදී පොලීසිය විසින් ප්‍රශ්න කර, නිලධාරීන් විසින් පොලීසිය වෙත රැගෙන ගොස් අමානුෂික ලෙස පහරදී ඇති බවයි.
ඔහු විසින් රජයේ ප්‍රවෘත්ති දෙපාර්තමේන්තු හැඳුනුම්පත හා රූපවාහිනී හැදුනුම්පත පෙන්වාදී සිටියදීත් පහරදී අත්අඩංගුවට ගෙන ඇති බවට වාර්තා වනවා.
පොලීසියේ අවිගබඩාව රූගත කර ඇති බවටත්, එමගින් ජාතික ආරක්ෂාවට හානි කර ඇති බවටත්, පොලිසිය විසින් චෝදනා කර තිබෙනවා.
දිනෙත් කුමාර අද (01) දක්වා රක්ෂිත බන්ධනාගාර ගත කර ඇති අතර, ඔහු අද යළි අධිකරණයට ඉදිරිපත් කිරීමට නියමිතයි.
අදාළ පහරදීම හා අත්අඩංගුවට ගැනීම දේශබන්දු තෙන්නකෝන් මහතා වැඩබලන තනතුරට පත්වූ දිනයේදීම වීම විශේෂත්වයක්.
