කොළඹ ජනාධිපති මන්දිරයට ඇතුළුවී එහි දේපළවලට හානි සිදුකිරීම සම්බන්ධයෙන් තවත් තරුණයෙක් අත්අඩංගුවට ගෙන තිබෙනවා.
කොළඹ මධ්‍යම කොට්ඨාස අපරාධ විමර්ශන කාර්යාංශය මගින් අද (27) පෙරවරුවේ කොළඹ හුසේනියා වීදිය ප්‍රදේශයේදී ඔහුව අත්අඩංගුවට ගෙන තිබෙනවා.
පොලීසිය සඳහන් කළේ අදාළ 26 හැවිරිදි තරුණයා කොළඹ 14, ද මැල් මාවත ප්‍රදේශයේ පදිංචිකරුවෙකු බවයි. ඔහු වෙළෙඳසැළක සහයකයෙකු ලෙස සේවය කරන පුද්ගලයෙකු බවද පොලීසිය සඳහන් කරනවා.
පසුගියදා ජනාධිපති මන්දිරය තුළට විරෝධතාකරුවන් ඇතුලුවීමෙන් පසු එහිදී මුදල් ගණන් කරන වීඩියෝවක් සමාජ මාධ්‍ය තුළ හුවමාරුවී තිබුණි. පොලීසිය සඳහන් කළේ මෙම පුද්ගලයා එම මුදල් ගණන් කරමින් සිටි කණ්ඩායමේ සාමාජිකයෙකු බවට හඳුනාගත් බවයි.
