මැයි මස අවසන් වීමට පෙර විද්‍යාපීඨ සඳහා නවක සිසුන් කණ්ඩායම් බඳවාගෙන අවසන් කරන බව අධ්‍යාපන ඇමැති සුසිල් ප්‍රේම්ජයන්ත මහතා පවසනවා.
ඔහු මේ බව කියා සිටියේ ඊයේ (28) පැවැති පාර්ලිමේන්තුවේදී විපක්ෂ නායක සජිත් ප්‍රේමදාස මහතාගේ යොමු කළ පැනයකට පිළිතුරු ලබා දෙමින්.
ඒ අනුව සිසුන්ට අමාත්‍යාංශය විසින් පිරිනමන රුපියල් 5000 දීමනාව සහ රැකියාව ලැබීමෙන් පසු ගෙවීම් පදනම මත බැංකු හරහා ලබා දෙන රුපියල් 15000 ණය මුදල ද පිරිනමන බවයි අමාත්‍යවරයා මෙහිදී සඳහන් කළේ.
අද වන විට ගුරු අධ්‍යාපනඥ සේවය තුළ සිටින්නේ 40%ක් බවත් ඒ සඳහා අවශ්‍ය පිරිස් බඳවා ගැනීමට ද කඩිනමින් සිදු කරන බවද ඔහු කියා සිටියා.
අපොස උසස් පෙළ විභාගයේ Z අගය මත විෂය වර්ගය අනුව කුසලතා පදනම සහ දිස්ත්‍රික් පදනමින් අයදුම්පත් කැඳවා සම්මුඛ පරීක්ෂණ පවත්වා තිබෙන බවත් එහි ඇගයුම් කටයුතු අවසන් අදියරේ තිබෙන බවත් අමාත්‍යවරයා වැඩිදුරටත් ප්‍රකාශ කළා.
