ගැහැණු දරුවන්ගේ ලිංගික හැසිරීම් සඳහා කැමැත්ත පළ කිරීමේ වයස් සීමාව අවුරුදු 14ට අඩු කිරීම මඟින් කාන්තා සහ පිරිමි ගණිකා වෘත්තිය ප්‍රචලිත කිරීම සඳහා උත්සාහයක් පවතින බවට ජාතික සංවිධාන එකමුතුව චෝදනා කරනවා.
බොරැල්ල එන්.එම්. පෙරේරා කේන්ද්‍රයේ ඊයේ (20) පැවති ප්‍රවෘත්ති සාකච්ඡාවකදී එම සංවිධානය මේ බව පවසා තිබෙනවා.
මෙහිදී ජ්‍යෙෂ්ඨ නීතීඥ කල්‍යානන්ද තිරාණගම සහ වෛද්‍ය වසන්ත බණ්ඩාර යන මහත්වරුන් විසින් මේ සම්බන්ධයෙන් විශේෂ හෙළිදරව්වක් සිදු කර ඇති බවද වාර්තා වෙනවා.
මේ අතර, මෙම අවස්ථාවේදී දේශහිතෛෂී ජාතික ව්‍යාපාරයේ මහ ලේකම්
වෛද්‍ය වසන්ත බණ්ඩාර මහතා පවසා ඇත්තේ ලිංගික හැසිරීම් සඳහා වයස් සීමාව අඩු කිරීම මෙරට දරුවන් අපයෝජනයට ලක්කිරීම ප්‍රවර්ධනය කිරීමට දරන උත්සාහයක් බවයි.
1995 වසරේ දී සිදු කළ දණ්ඩනීති සංග්‍රහයේ සංශෝධනයට අනුව මෙරට අවුරුදු 16 ට අඩු දැරිවියක් ස්ව කැමැත්තෙන් අපයෝජනයට ලක් වුවද එය ස්ත්‍රී දූෂණය යටතට වැටෙන බරපතළ වරදක් බවත්, අධිකරණ අමාත්‍ය විජේදාස රාජපක්ෂ මහතා එම වයස් සීමව මෙම පනත මගින් අවුරුදු 14 දක්වා අඩුකර ඇති බවටද ඔහු එහිදී චෝදනා කර තිබෙනවා.
මෙහිදී වරදකරුවා බවට පත්වන පුරුෂයාගේ වයස් සීමාව අවුරුදු 18 සිට 22 දක්වා ඉහළ දමා ඇති බවද පෙන්වා දුන් වෛද්‍ය වසන්ත බණ්ඩාර මහතා, හදිසි අවශ්‍යතාවයක් ලෙස සලකා මෙම පනත ගෙන එන්නේ මෙය ජනතාවගේ දැවෙන ප්‍රශ්නයක් නිසාදැයි ප්‍රශ්නකර ඇති බවද වාර්තා වෙනවා.
