ගල්කිස්සේ පිහිටි මහල් නිවාස සංකීර්ණයකින් 27 හැවිරිදි තරුණියක් ඇද වැටී ජීවිතක්ෂයට පත්වී තිබෙනවා.
ඇය එංගලන්තයේ පුරවැසිභාවය හිමි තරුණියක් වන අතර තම 29 හැවිරිදි පෙම්වතා සමග එහි මාස 6ක පමණ කාලයක් මෙම මහල් නිවාස සංකීර්ණයේ රැඳී සිට ඇති බවට තොරතුරු අනාවරණය වු බව පෙලිසිය පවසනවා.
ඇය හෙට (10) දින විදෙස්ගතවීමට සූදානමින් සිටි බවද සදහන්.
අද (09) අලුයම 2.40ට පමණ ගල්කිස්ස, අල්විස් මාවතේ පිහිටි මහල් නිවාසයක 13 වැනි මහලෙන් තරුණියක් ඇද වැටී මියගොස් ඇති බවට ගල්කිස්ස පොලීසියට පැමිණිල්ලක් ලැබී තිබුණා.
වැල්ලවත්තේ පදිංචි 29 හැවිරිදි නීති ශිෂ්‍යයෙකු වන සිය පෙම්වතා හමුවීම සඳහා පසුගිය මාර්තු මස 8 වනදා ඇය දිවයිනට පැමිණ තිබෙනවා.
එම තරුණයා ද ස්විට්සර්ලන්තයේ අධ්‍යාපනය ලබන අතරතුර එම තරුණයා පසුගිය වසරේදී මෙරටට පැමිණ තිබෙන අතර දෙදෙනා අදාළ මහල් නිවාස සංකීර්ණයේ එකට දිවි ගෙවා තිබෙන බව පොලිසිය සඳහන් කළා.
ඔවුන් දෙදෙනා ෆේස්බුක් ඔස්සේ ප්‍රේම සම්බන්ධතාව ගොඩනගා ගෙන තිබෙනවා.
පොලීසිය පෙම්වතාගෙන් සිදුකළ ප්‍රශ්න කිරීම්වලදී ඔහු පවසා ඇත්තේ, ඊයේ රාත්‍රියේ දෙදෙනා අතර ආගම සම්බන්ධයෙන් සුළු බහින්බස්වීමක් ඇති වූ බවත් ඊයේ දහවල් බීර කෑන් 6ක් පමණ පානය කර සිටි බවත් රාත්‍රියේ නින්දට යෑමෙන් පසුව තම පෙම්වතියගේ කිසිඳු ප්‍රතිචාරයක් නොමැතිවීම හේතුවෙන් සිදුකළ සොයාබැලීමේදී ඇයගේ මළසිරුර දුටු බවත් ඔහු පොලීසිය හමුවේ පවසා තිබෙනවා
අනතුරුව අද දහවල් සිද්ධිය වූ ස්ථානය ගල්කිස්ස වැඩබලන මහෙස්ත්‍රාත් රත්නා ගමගේ මහත්මිය විසින් පරික්ෂා කරනු ලැබුවා.
පොලීසිය පැවසුවේ හෙට (10) දිනයේදී සිදුකරන පශ්චාත් මරණ පරීක්ෂණයෙන් පසුව මෙය ඝාතනයක් ද සියදිවි නසාගැනීමක් ද යන්න පිළිබඳව අනාවරණය කරගෙන සිද්ධිය සම්බන්ධයෙන් වැඩිදුර විමර්ශන සිදුකරන බවයි.
