මියන්මාරයේ බලයෙන් පහ කළ නායිකා අවුන් සාන් සූකී මහත්මිය සාපරාධී චෝදනා තුනකට වරදකරු කරමින් එරට හමුදා අධිකරණයක් ඇයට තවත් වසර 04ක සිර දඬුවමක් නියම කර තිබෙනවා.
හමුදා පාලනය යටතේ පවතින මියන්මාර අධිකරණය මෙලෙස සිව් වසරක සිර දඬුවම් විඳින සු කීට එලෙස තවත් සිව් වසරක සිර දඬුවම් නියම කර ඇත්තේ, බලපත්‍ර රහිතව සන්නිවේදන උපකරණ සන්තකයේ තබා ගැනීම ඇතුළු චෝදනා කිහිපයකට වරදකාරිය කරමින්.
වෝකි ටෝකි ළඟ තබාගෙන අපනයන – ආනයන නීතිය උල්ලංඝණය කිරීම හා තවත් සංඥා කට්ටලයක් ළඟ තබා ගැනීම සම්බන්ධයෙන් සූ කීට වසර 2 ක සිර දඬුවමක් නියම කර තිබෙනවා.
ඉතිරි වසර දෙකේ සිර දඬුවම ලබා දී ඇත්තේ, කොවිඩ් වසංගතයට අදාළ ආපදා කළමනාකරණ නීතිය කඩ කිරීමේ චෝදනාවටයි.
අවුන් සාන් සු චී චෝදනා කිහිපයක් සම්බන්ධයෙන් පසුගිය දෙසැම්බර් මාසයේදී සිරගත කෙරුණු අතර එහිදී ද ඇයට වසර හතරක සිර දඬුවමක් නියම කෙරුණා.
ඒ මැතිවරණ ප්‍රචාරක කටයුතුවල යෙදී සිටියදී උසිගැන්වීම් සහ කොවිඩ් නීති කඩ කිරීම සම්බන්ධයෙන්.
සු කීට එරෙහි නඩු විභාගය වාර්තා කිරීම සඳහා මාධ්‍යට අවසර හිමි නොවූ අතර සුකීගේ නීතිඥයින්ට මාධ්‍ය සහ ජනතාව සමග සන්නිවේදනය කිරීම ද තහනම් කර තිබුණා.
තව ද සු කී රඳවාගෙන සිටින්නේ කුමන ස්ථානයක ද යන්න මියන්මාර හමුදා පාලනය තවමත් හෙළි කර නැහැ.
නොබෙල් ත්‍යාගලාභී 76 හැවිරිදි සූ කී ඇයට එල්ලවී ඇති සියලු චෝදනා ප්‍රතික්ෂේප කර ඇති අතර ඇයගේ ආධාරකරුවන් පවසන්නේ ඇයට එරෙහි නඩු පදනම් විරහිත බවත්, හමුදා පාලනය සූ කිගේ දේශපාලන ජීවිතය අවසන් කිරීමට සැලසුම් මෙලෙස ක්‍රියාත්මක කර ඇති බවයි.
