ශ්‍රී ලංකා දුම්රිය සේවයේ සියළුම කාර්ය මණ්ඩලවල නිවාඩු අද (14) දින සිට වහාම ක්‍රියාත්මක වන පරිදී අවලංගු කිරීමට දුම්රිය සාමාන්‍යධිකාරීවරයා පියවර ගෙන තිබෙනවා.
අදාළ නිවේදනයට අනුව දුම්රිය සේවාව අඛණ්ඩව සහ කාර්යක්ෂමව පවත්වාගෙන යාම සඳහා මාර්තු 15 දින සේවයට වාර්තා නොකරන සියළු නිලාධාරින්ගේ ඒ පිළිබඳ නිදහසට කරුණු විමසා තමා වෙත වාර්තාවක් ඉදිරිපත් කරන ලෙස දුම්රිය සාමාන්‍යධිකාරී ඩබ්ලිව් ඒ.ඩී.එස්. ගුණසිංහ මහතා සියළු අංශවල ප්‍රධානීන් වෙත දන්වා ඇති බවයි වාර්තා වන්නේ.
පෙබරවාරි 27 වනදා 2321/07 දරන රජයේ අතිවිශේෂ ගැසට් නිවේදනයට අනුව ශ්‍රී ලංකා දුම්රිය සේවය අත්‍යවශ්‍ය සේවාවක් බවට ජනාධිපතිවරයා විසින් ප්‍රකාශයට පත් කර තිබෙනවා.
මේ අනුව 1979 අංක 61 දරන අත්‍යවශ්‍ය මහජන සේවා පනතේ 2 වන වගන්තිය ප්‍රකාරව අත්‍යවශ්‍ය මහජන සේවාවක් ලෙස මෙය ප්‍රකාශයට පත්කර ඇති බවයි වාර්තා වන්නේ.
ශ්‍රී ලංකා දුම්රිය දෙපාර්තමේන්තුවේ ලොකෝමොටිව් දුම්රිය ඉංජිනේරු සංගමය වෘත්තීය සමිතිය විසින් පැය 24ක වැඩ වර්ජනයක් ප්‍රකාශයට පත් කර ඇති අවස්ථාවක සාමාන්‍යධිකාරීවරයා මෙම තීරණය ගෙන ඇත්තේ.
ඔවුන් පවසන්නේ අද (14) මධ්‍යම රාත්‍රියේ සිට මෙම වැඩ වර්ජනය ක්‍රියාත්මක කරන බවයි.
