කැනඩා ගුවන්විදුලි මාධ්‍යවේදීන්ට චීනයේ වීසා නොලැබීම නිසා බීජිංහි ප්‍රවෘත්ති කාර්යාංශය වසා දැමීමට කැනඩා ගුවන් විදුලි සංස්ථාව තීරණය කර තිබේ.
කැනඩා ගුවන්විදුලි සංස්ථාව (CBC) පසුගියදා ප්‍රකාශ කළේ එහි මාධ්‍යවේදීන් සඳහා චීනයේ රැකියා වීසා බලපත්‍රයක් ලබාගැනීම සඳහා වසර දෙකක් නිෂ්ඵලව බලා සිටීමෙන් පසුව ඔවුන්ගේ බීජිං හි ප්‍රවෘත්ති කාර්යාංශය වසා දැමූ බවයි.
වසර 40 කට පසු බීජිං කාර්යාංශය මෙලෙස වසා දැමීමට කටයුතු කර ඇති අතර ඔවුන් නැගෙනහිර ආසියාව ආවරණය කිරීම සඳහා නව ස්ථානයක් සොයන බව සදහන් වේ.
CBC ප්‍රවෘත්ති ප්‍රධාන කර්තෘ බ්‍රොඩි ෆෙන්ලෝන් පැවසුවේ තම ප්‍රවෘත්ති ආයතනය පසුගිය වසර දෙක තුළ කැනඩාවේ චීන නිලධාරීන් සමඟ වීසා බලපත්‍ර සම්බන්ධයෙන් බොහෝ සාකච්ඡා පැවැත්වූ නමුත් විසඳුමක් නොමැති වූ බවයි.
අප්‍රේල් මාසයේදී කැනඩාවේ චීන තානාපතිවරයාට යවන ලද ලිපියක් පිළිගෙන ඇති නමුත් ඒ පිළිබද ප්‍රතිචාරයක් නොලැබුණු බව ෆෙන්ලෝන් පැවසීය.
අදහස් දැක්වීම සඳහා කරන ලද ඉල්ලීමකට පවා ඔටාවා හි චීන තානාපති කාර්යාලය ප්‍රතිචාර නොදැක්වූ බව සදහන් වේ.
CBC හි ප්‍රංශ භාෂා සේවාවේ (රේඩියෝ-කැනඩා) වාර්තාකරුවෙකු 2020 ඔක්තෝම්බර් මාසයේදී වීසා බලපත්‍රයක් සඳහා අයදුම් කිරීමෙන් පසුව චීනයෙන් වීසා බලපත්‍රයක් බලාපොරොත්තුවෙන් සිටින බව ෆෙන්ලෝන් පැවසීය.
කොවිඩ් -19 වසංගතය ආරම්භයේදී චීනය අගුලු දැමීමට පටන් ගත් විට නැවත කැනඩාවට පැමිණි CBC හි ඉංග්‍රීසි භාෂා මාධ්‍යවේදියාට ස්ථිර වාර්තාකරුවෙකු ලෙස නැවත චීනයට පැමිණීමට නොහැකි වී ඇති බව ද පැව‍සේ.
CBC ඉදිරි මාස කිහිපය තුළ නැගෙනහිර ආසියාව ආවරණය කිරීම සඳහා නව ස්ථානයක් සොයනු ඇති අතර, ඉදිරි වසර දෙක සඳහා සිය මාධ්‍යවේදියා තායිවානයේ ස්ථානගත කරන බව ෆෙන්ලෝන් වැඩිදුරටත් පැවසීය.
