අද මධ්‍යම රාත්‍රියේ සිට වැඩ වර්ජනයක් ආරම්භ කරන බව ඒකාබද්ධ තැපැල් වෘත්තීය සමිතිය පවසනවා.
අද මධ්‍යම රාත්‍රියේ සිට පැය 48ක් ක්‍රියාත්මක වන පරිදි මෙම වර්ජනය ආරම්භ කිරීමට නියමිත බවයි ඒකාබද්ධ තැපැල් වෘත්තීය සමිතිය සඳහන් කරනවා.
නුවර සහ නුවරඑළිය තැපැල් කාර්යාල පිහිටි ගොඩනැගිළි විකිණීමේ තීරණයට එරෙහිව මෙම වර්ජනය සිදුකරන බව ඔවුන් පවසන්නේ.
කොළඹ මධ්‍යම තැපැල් හුවමාරුවේ සේවකයින් අද (07) පස්වරු 4.00 සිට මෙම වෘත්තීය ක්‍රියාමාර්ගයට අවතීර්ණ වී ඇති බව ඔහු සදහන් කළා.
කෙසේවෙතත් තැපැල්පති එස්. ආර්. ඩබ්ලිව්. එම්. ආර්.පී. සත්කුමාර අද පස්වරුවේ නිවේදනයක් නිකුත් කරමින් සඳහන් කර තිබුණේ හෙට සිට ලබන 10 වනදා දක්වා තැපැල් දෙපාර්තමේන්තුවේ සමස්ත කාර්ය මණ්ඩලයේම නිවාඩු අවලංගු කරන බවයි.
මේ අතර, නුවරඑළිය තැපැල් ස්ථානය ඉදිරිපිට අද විදේශිකයින් පිරිසක් ‘නවාතැන් ගැනීමට හෝටලයක් සදහා ප්‍රමාණවත් වුවත් රාජකීය තැපැල් කාර්යාලයක් අනාගතයට ඉතිරි කරන්න යන්න සටහන් කළ විරෝධතා පුවරුවක් ප්‍රදර්ශනය කරමින් උද්ඝෝෂණයක නිරත වූ බවට වාර්තා වනවා.
