මහින්ද රාජපක්ෂ මහතා පසුගියදා සැත්කමකට භාජනය කළ බව ඔහුගේ වැඩිමහල් සොහොයුරු වාරිමාර්ග අමාත්‍ය සහ රාජ්‍ය ආරක්ෂක හා ආපදා කළමනාකරණ රාජ්‍ය අමාත්‍ය සහ ස්වදේශ කටයුතු රාජ්‍ය අමාත්‍ය චමල් රාජපක්ෂ මහතා පවසනවා.
ගම්පොල ඉහලවෙල ශ්‍රී සම්බුද්ධ ජයන්ති විහාරස්ථානයේ තිස්හය රියන් උසැතිව නිර්මාණය කර ඇති සක්මන් ප්‍රතිමා වහන්සේ නිරාවරණය කිරීමේ පුණ්‍ය උත්සවයට ඊයේ (27) සහභාගී වෙමින් රාජ්‍ය අමාත්‍යවරයා ඒ බව සදහන් කළා.
චමල් රාජපක්ෂ මහතා සදහන් කළේ මෙම ආගමික උත්සවයට අග්‍රාමාත්‍ය මහින්ද රාජපක්ෂ මහතා පැමිණීමට නියමිතව තිබුණද ඔහුට සිදුකල ශල්‍යකර්මය නිසා තමන් මෙම ස්ථානයට පැමිණි බවයි.
කෙසේ වෙතත් අග්‍රාමාත්‍ය මහින්ද රාජපක්ෂ මහතා රෝහල්ගත කෙරුණු බවට පළවූ පුවත් අසත්‍ය වන බව පෙරේදා (26) දිනයේ මාධ්‍යවේදීන් නැගූ ප්‍රශ්නවලට පිළිතුරු දෙමින් අග්‍රාමාත්‍ය මහින්ද රාජපක්ෂ මහතාගේ වැඩිමල් පුත් ක්‍රීඩා අමාත්‍ය නාමල් රාජපක්ෂ මහතා පැවසුවා.
ඔහු සදහන් කළේ තමන් සහ පියා ලෙඩෙකු බැලීමට රෝහලට ගිය නමුත් ලෙඩෙකු වශයෙන් සිය පියා රෝහලට නොගිය බවත් බැලීමට ගිය රෝගියා හට සැත්කමක් සිදුකළේද යන්න සම්බන්ධව තමන් නොදන්නා බවයි.
පෙර සැලසුම් කළ සැත්කමක් වෙනුවෙන් අග්‍රාමාත්‍ය මහින්ද රාජපක්ෂ මහතා පසුගිය 24 වන දින කොළඹ ප්‍රධාන පෙළේ පෞද්ගලික රෝහලකට ඇතුළත් කරනු ලැබූ බවට මාධ්‍ය වාර්තා කළා.
