කොවිඩ් ව්‍යාප්තිය හේතුවෙන් මධ්‍යම චීනයේ වුහාන් සිට වයඹ දෙසින් ෂිනින් දක්වා චීන නගරයන් අගුලු දැමීම හේතුවෙන් මිලියන ගණනක් ජනතාව දැඩි පීඩාවට පත් වී ඇති බව වාර්තා වේ.
චීනය පසුගිය බ්‍රහස්පතින්දා රට පුරා නව කොවිඩ් රෝගීන් 1,000 කට වඩා වැඩි සංඛ්‍යාවක් තෙවැනි දිනටත් වාර්තා කර තිබිණ.
මෙම වසර මුලදී ෂැංහයි සම්පූර්ණයෙන්ම අගුලු දැමීමකට ලක් කිරීමේදී දිනකට දස දහස් ගණනක් වශයෙන් රෝගීන් වාර්තා වීම සමඟ සසඳන විට එය සාමාන්‍ය අගයක් වුවත් තවත් සීමා කිරීම් සිදුකිරීමට එය ප්‍රමාණවත් බවයි එරට වාර්තාවල දැක්වේ.
2019 අග භාගයේදී ලොව ප්‍රථම වරට කොවිඩ් පැතිරීම ආරම්භ වූ වුහාන් හි, මේ සතියේ දිනකට නව ආසාදන රෝගීන් 25 ක් පමණ වාර්තා වූ අතර පසුගිය දින 14 තුළ නගරයේ රෝගීන් 240 ක් වාර්තා වී තිබේ.
ප්‍රාදේශීය බලධාරීන් වුහාන්හි එක් දිස්ත්‍රික්කයක 800,000 කට වැඩි පිරිසකට ඔක්තෝබර් 30 දක්වා නිවෙස්වල රැඳී සිටින ලෙස නියෝග කර ඇත.
දේශීය ඌරු මස් සැපයුම් දාමය හරහා කොවිඩ් ව්‍යාප්ත වී ඇති බවට සමාජ මාධ්‍යවල පින්තූර සහ පෝස්ට් පළවීමත් සමග සමහර ප්‍රදේශවල ඌරු මස් විකිණීම ද අත්හිටුවා ඇති බව වාර්තා වේ.
