චීනය සිය දැඩි “ශුන්‍ය කොවිඩ් ප්‍රතිපත්තිය” පසුගිය වසරේ දෙසැම්බර් 07 වන දින ඉවත් කිරීමෙන් පසු, කොවිඩ් -19 ආශ්‍රිත මරණ 60,000 කට ආසන්න සංඛ්‍යාවක් වාර්තා වී ඇති බව චීනය පසුගියදා නිවේදනය කළ බව එරට ජාතික සෞඛ්‍ය කොමිසම උපුටා දක්වමින් ග්ලෝබල් ටයිම්ස් පුවත් සේවය වාර්තා කර තිබේ.
චීනයේ ජාතික සෞඛ්‍ය කොමිෂන් සභාව 2022 දෙසැම්බර් 8 සිට මේ වසරේ ජනවාරි 12 දක්වා කාලය තුළ කොවිඩ්-19 ආශ්‍රිත මරණ 59,938 ක් අනාවරණය කර ඇති අතර, දෙසැම්බර් 07 වන දින කොවිඩ් ප්‍රතිපත්තිය ලිහිල් කිරීම නිසා රෝගීන්ගේ වැඩිවීමක් සිදුව ඇති බව වාර්තා කර ඇත.
කොවිඩ් -19 දත්ත හෙළි කළ සෞඛ්‍ය කොමිෂන් සභාවේ නිලධාරියෙකු පවසා ඇත්තේ, එම කාලය තුළ මියගිය අයගේ සාමාන්‍ය වයස අවුරුදු 80 ක් වන අතර, මරණ වලින් සියයට 90 ක් වයස අවුරුදු 65 ට වැඩි අය සහ සියයට 56.5 ක් වයස අවුරුදු 80 ට වැඩි අය බවයි.
වාර්තා වූ කොවිඩ්-19 මරණ 59,938 අතුරින්, 5,503 ක් වෛරසය නිසා ඇති වූ ශ්වසන අකර්මන්‍යතාවය සිදුව ඇති අතර, මරණ 54,435 ක් වසංගත ආසාදන සමඟ සන්කූලතා හේතුවන් සිදුව ඇති බව පැවැසේ.
චීන සෞඛ්‍ය නිළධාරීන් පවසා ඇත්තේ, ශීත ඍතුව යනු බොහෝ විට වැඩිහිටියන්ට බලපාන ශ්වසන සහ වෙනත් රෝග ව්‍යාප්තවන සමය බවත්, එබැවින් වයෝවෘද්ධ පුද්ගලයන්ගෙන් සාපේක්ෂව විශාල සංඛ්‍යාවක් වර්තමාන වසංගත රැල්ලට ගොදුරු වී ඇති බවත්ය.
