ටිබෙට් ආධ්‍යාත්මික නායක දලයි ලාමාට ප්‍රශංසා කරන සංගීත ඛණ්ඩයක් ඉදිරිපත් කිරීම නිසා ටිබෙට් ස්වයං පාලන ප්‍රාන්තයේ ප්‍රාදේශීය චීන බලධාරීන් විසින් ටිබෙට් ජාතිකයින් පස් දෙනෙකු අත්අඩංගුවට ගෙන තිබේ.
මෙය සිදු වූයේ,ජනප්‍රිය චීන වීඩියෝ හුවමාරු වේදිකාවක් වන කුයිෂූහි සංගීත තරඟයකදී පිරිමි කණ්ඩායමක් ගීතයක් ගායනා කරමින් සිටියදී බව ද වාර්තා වේ.
චීන රජය විසින් නියම කර ඇති රෙගුලාසි කඩ කල බවට ඔවුන්ට චෝදනා එල්ල වී ඇති බව සදහන් වේ.
අත්අඩංගුවට ගත් පස් දෙනාගෙන් මේ වන විට හෙළි වී ඇත්තේ එක් අයෙකුගේ අනන්‍යතාවය පමණක් වන අතර ඔහු සංගීතඥයකු වන ඩෙරාබ් ලෙස හදුන්වා තිබේ.
චීන බලධාරීන් ගීතය ඉදිරිපත් කරන අතරතුර පුද්ගලයින් රඳවා තබා ගෙන ඇති බවත් ඉදිරිපත් කරන ලද ගීතයෙන් උපුටා ගැනීමක් ලෙස “උතුම් ලාමා ටිබෙටයේ උපත ලැබීය, විදේශ රටවල පුණ්‍ය ක්‍රියා සිදු කළේය, ආදරණීය සහ දයානුකම්පිත ලාමා – ඔහුගේ ඉක්මන් නැවත පැමිණීම සඳහා යාච්ඤා කරන්න.” යනුවෙන් සදහන් වූ බව මාධ්‍ය වාර්තා කර ඇත.
චීන පොලිසිය අත්අඩංගුවේ පසු වුවන්ගෙන් මුළු දවස පුරාම ප්‍රශ්න කල බවත් පසුව පස් දෙනෙකුගෙන් හතර දෙනෙකු නිදහස් කරන ලද බවත් සදහන් වේ.
එක් අයකු තවමත් චීන බලධාරීන්ගේ අත්අඩංගුවේ පසුවන බවත් කිසිදු උත්සව හෝ රැස්වීම් වල සහභාගී වීමෙන් වළකින බවට ප්‍රතිඥාවක් අත්සන් කිරීමට ඔහුට බල කෙරුණු බවත් අදාළ වාර්තාවේ දැක්වේ.
මීට අනුව සංගීතඥ ඩෙරාබ්ට මින් පසු වේදිකාවක රඟ දැක්වීමට අවශ්‍ය නම්, ඔහුට පළමුව බලධාරීන්ගෙන් අවසර ලබා ගත යුතු බව ද පැවසේ.
