මීට දින දෙකකට පෙර වෛද්‍ය නජිත් ඉන්දික මහතා අවිස්සාවේල්ල දිස්ත්‍රික් රෝහලේ කොවිඩ් තත්ත්වය පිළිබදව ෆේස්බුක් සමාජ අඩවියේ පලකළ සටහනක් පිළිබදව අපරාධ පරීක්ෂණ දෙපාර්තමේන්තුව විසින් ප්‍රශ්න කර තිබෙනවා.
ඔහු සේවය කරන අවිස්සාවේල්ල දිස්ත්‍රික් රෝහලට පැමිණි අපරාධ පරීක්ෂණ දෙපාර්තමේන්තුවේ නිලධාරීන් දෙදෙනෙකු පවසා ඇත්තේ වෛද්‍ය නජිත් ඉන්දික මහතාගේ මානසික තත්ත්වය කෙසේදැයි පරික්ෂා කර පැමිණෙන ලෙසට ප්‍රදේශය භාර නියෝජ්‍ය පොලිස්පතිවරයා පැවසූ බවයි.
එනම් වෛද්‍ය නජිත් ඉන්දික මහතා යම් කිසි ආතතියකින් පසුවන්නේදැයි විමසා බලා ඒ පිළිබදව වාර්තා කරන ලෙසට තමන්ට නියෝජ්‍ය පොලිස්පතිවරයා පැවසූ බව එම නිලධාරීන් දෙදෙනා නජිත් ඉන්දික මහතාට පවසා තිබෙනවා.
එම නිලධාරීන් දෙදෙනා වෛද්‍ය නජිත් ඉන්දික මහතාගෙන් විමසා ඇත්තේ “සර්, ඇත්තටම අවිස්සාවේල්ලෙ කොරෝනා තත්වය ඔච්චරම දරුණුයිද සර්? අපිත් මේවයෙ ජීවත්වෙන මිනිස්සුනෙ” යනුවෙනි.
පසුව ඔහු පසුගිය මාසය තුළ කොවිඩ් රෝගීන් වාර්තාවීම, මරණ වැඩිවූ ආකාරය, වාට්ටුවේ පහසුකම් දියුණුවී ඇති ආකාරය, පසුගිය සතියේ සිදුවූ විශාල වෙනස්කම් ආදී සියල්ලම ඔවුන් දෙදෙනාට පැහැදිලි කර තිබෙනවා.
