විදුලි ගාස්තු වැඩි කරන ලෙස ඉල්ලා ලංකා විදුලි බල මණ්ඩලය යොමු කර ඇති ඉල්ලීමට අදාළව ඉදිරිපත් කර ඇති දත්ත, වර්තමාන තත්ත්වය හා නොගැළපෙන බව, මහජන උපයෝගීතා කොමිසම ලංකා විදුලි බල මණ්ඩලයට දැනුම් දී තිබෙනවා.
ඒ,ලංකා විදුලි බල මණ්ඩලයේ සාමාන්‍යාධිකාරිවරයා වෙත ලිපියක් යොමු කරමින්.
ඔක්තෝබර් මස 18 වැනිදාට පෙර මණ්ඩලය සතු නවතම දත්ත මහජන උපයෝගීතා කොමිසම වෙත වෙත ඉදිරිපත් කරන ලෙස අදාළ ලිපිය මඟින් විදුලිබල මණ්ඩලයෙන් ඉල්ලා සිටිනවා.
පසුගිය සැප්තැම්බර් මස 04 සහ 26 යන දිනවල විදුලි ගාස්තු වැඩි කිරීමක් ඉල්ලා ලංකා විදුලි බල මණ්ඩලය විසින් යොමුකළ ඉල්ලීමේ සඳහන් දත්ත වර්තමානය හා නොගැළපෙන බව මහජන උපයෝගීතා කොමිසම සඳහන් කළා.
මහජන උපයෝගීතා කොමිසම පෙන්වා දෙන්නේ සැප්තැම්බර් මාසයේ දෛනික විදුලි ඉල්ලුම ගිගාවොට් පැය 44.7 ක් ලෙස පුරෝකථනය කර තිබුණ ද සැබෑ දෛනික විදුලි ඉල්ලුම ගිගාවොට් පැය 41.01 ක් බවයි.
මේ අතර ජල විදුලි උත්පාදන ධාරිතාව ද, විදුලි බල මණ්ඩලය දක්වා ඇති ප්‍රමාණයට වඩා මේ වන විට ඉහළ ගොස් ඇති බව කොමිසම පවසනවා.
හජන උපයෝගීතා කොමිසමේ අදහස වන්නේ ගල් අඟුරු භාවිතයෙන් විදුලි උත්පාදනය සම්බන්ධව විදුලිබල මණ්ඩලය කර ඇති පුරෝකථනය නොගැළපෙන බවයි.
මේ තත්ත්වයන් තුළ ඉල්ලා ඇති විදුලි ගාස්තු සංශෝධනය පිළිබඳ සළකා බැලීම සඳහා නවතම දත්ත තමන් වෙත ඉදිරිපත් කරන්නැයි මහජන උපයෝගීතා කොමිසම, විදුලි බල මණ්ඩලයේ සාමාන්‍යාධිකාරිවරයා වෙත ලිපියක් යොමු කරමින් පවසයි.
