2023 ක්රිකට් ලෝක කුසලාන තරගාවලියේ අවසාන මහා තරගය අද (19) අහමදාබාද්හි නරේන්ද්ර මෝදි ක්රීඩාංගණයේ දී පැවැත්වීමට නියමිතයි.
අද තරගය මෙරට වෙලාවෙන් පස්වරු 02.00ට ආරම්භ වීමට නියමිතයි.
ඒ, සත්කාරක ඉන්දීය කණ්ඩායම සහ ඔස්ට්රේලියාව අතර අවසාන මහා තරගය පැවැත්වෙනවා.
මූලික වටේ තරග සියල්ලම ජයග්රහණය කිරිමට ඉන්දීය කණ්ඩායම සමත් වුණා.
ඔස්ට්රේලියාව ක්රිකට් ලෝක කුසලාන අවසාන මහා තරගයකට ක්රීඩා කරන 08 වැනි අවස්ථාව මෙය වනවා.
ඉන් අවස්ථා 05ක දී ඔවුහූ ලෝක කුසලානය ජයග්රහණය කිරිමට සමත් වුණා.
ඔස්ට්රේලියාව සහ ඉන්දියාව මීට පෙර එක් අවස්ථාවක දී අවසන් මහා තරගයක හමු වී තිබෙන අතර, එහි දී එවකට ලොව සිටි ප්රබලම ක්රිකට් කණ්ඩායමක් වූ ඔස්ට්රේලියාව හමුවේ ඉන්දීය කණ්ඩායම පරාජයට පත් වූයේ 2003 ලෝක කුසලාන අවසන් මහා තරගයේ දී.
ඉන්දියාව අවසාන මහා තරග 03ක ක්රීඩා කර ඇති අතර, ඉන් අවස්ථා දෙකක දී ශුරතාව දිනා ගෙන තිබෙනවා.
ඒ, 1983 දී බටහිර ඉන්දීය කොදෙව් කණ්ඩායම සහ 2011 දී ශ්රී ලංකාව පරාජයට පත් කරමින්.
තරගාවලියේ ශූරයින්ට පිරිනමනු ලබන කුසලානය සමඟ ඉන්දු – ඔස්ට්රේලියා නායකයින් ඊයේ නිල ඡායාරූපය සඳහා පෙනී සිටියා.
එමෙන්ම දෙරටේ ක්රීඩකයින් නරේන්ද්ර මෝදි ක්රීඩාංගණයේදී සිය අවසන් පුහුණු සැසිය සදහා ද එක්ව සිටි අතර එහිදි තරගයට භාවිත කරන තණ තීරුවේ ඡායාරූපයක් ඔස්ට්රේලියා නායක පැට් කමින්ස් ලබාගත් ආකාරය විදෙස් මාධ්යයේ දැඩි අවධානයක් දිනා ගෙන තිබුණා.