පාකිස්තාන පාර්ලිමේන්තුවේ දී ගොවීන්ට ලබාදීමට එකඟ වූ සහන පැකේජය දින 10ක් ඇතුළත ක්‍රියාත්මක කිරීමට රජය අපොහොසත් වුවහොත් විරෝධතා අරඹන බවට එරට ගොවීන් අනතුරු අගවා තිබේ.
එම විරෝධතා දේශපාලඥයන්ගේ නි‍වෙස් ඉදිරිපිට මෙන්ම අගනුවරදී ද පවත්වන බවට ඔවුන් පවසා ඇත.
ගොවි නියෝජිතයන් මාධ්‍යවේදීන් අමතා පවසා ඇත්තේ ඔවුන්ගේ ඉල්ලීම් ඉටු නොකළහොත් නොවැම්බර් 4 වනදා සිට අඛණ්ඩව විරෝධතා පවත්වන බවයි.
පසුගිය මාස කිහිපය තුළ ඇති වූ අධික ගංවතුර හේතුවෙන් බලුකිස්තාන් සහ සින්ද් හි කෘෂිකාර්මික ඉඩම් සහ ස්ථාවර බෝගවලින් සියයට 70 ක් විනාශ වී ඇති එරට ගොවි සංවිධාන පවසයි.
ෆෙඩරල් සහ පළාත් ආණ්ඩු ගංවතුරෙන් හා වර්ෂාවෙන් පීඩාවට පත් ඉඩම් හිමියන් සඳහා සහනාධාර වහාම ක්‍රියාත්මක කළ යුතු බව ද එම සංවිධාන අවධාරණය කරයි.
කෘෂිකාර්මික අංශයේ පුනරුත්ථාපනය සඳහා විදේශ රටවලින් අරමුදල් පරිත්‍යාග කරන ලද නමුත් ඒවා භාවිතා කරන්නේ කා සඳහාද යන්න පිළිබඳව තමන්ට කිසිදු තොරතුරක් නැති බවත් ඒ පිළිබඳ විස්තර ලබා දෙන ලෙසත් ගොවි නියෝජිතයන් රජයට අවධාරණය කර තිබේ.
