ඉන්දියාවේ ශ්‍රී ලංකා මහ කොමසාරිස් මිලින්ද මොරගොඩ මහතාගේ ධූරකාලය මේ මස අගදී අවසන්වීමට නියමිතයි.
ඒ වෙනුවෙන් පසුගියදා ඉන්දියාවේ ප්‍රමුඛ සාමාගම් ජාලා දෙකක හිමිකරුවන් දෙදෙනෙකු වන අදානි සමූහ ව්‍යාපාරයේ සභාපති ගෞතම් අදානි හා හින්දුජා සමූහ යුරෝපයේ සභාපති ප්‍රකාශ් හින්දුජා යන දෙදෙනා විසින් දිවා, රාත්‍රී භෝජන සංග්‍රහයන් පවත්වා තිබෙන බවට වාර්තා වෙනවා.
අදානිගේ සමුගැනීමේ රාත්‍රී භෝජන සංග්‍රහය ඔහුගේ නිවසේදී පසුගිය සැප්තැම්බර් 05 වැනිදා පවත්වා තිබෙන අතර ප්‍රකාශ් හින්දුජා සිය සමුගැනීමේ දිවා භෝජන සංග්‍රහය මේ සතිය මුලදී පවත්වා තිබෙනවා.
අවස්ථා දෙකේදීම, මහ කොමසාරිස් මොරගොඩ විසින් මෙම ඉහළ පෙළේ ව්‍යාපාරිකයන් දෙදෙනා සමඟ තමා පැවැත්වූ සමීප සම්බන්ධතා සිහිපත් කරමින් ඔහු දිල්ලිහි දී සේවය කළ කාලය තුළ ඔහුට ලබා දුන් සහය සඳහා ඔවුන්ට ස්තූතිය ද පුදකර තිබෙන බවට වාර්තා වෙනවා.
1988 දී ගෞතම් අදානි විසින් ආරම්භ කරන ලද, අදානි සමූහය ඉන්දියාවේ විශාලතම ව්‍යාපාරවලින් එකක් වන අතර එම ව්‍යාපාරවලට වරාය කළමනාකරණය, විදුලි බල උත්පාදනය සහ සම්ප්‍රේෂණය, පුනර්ජනනීය බලශක්තිය, පතල් කැණීම්, ගුවන් තොටුපළ මෙහෙයුම්, ස්වාභාවික වායු, ආහාර සැකසුම් සහ යටිතල පහසුකම් ඇතුළත්.
මෝටර් රථ, තෙල් සහ විශේෂිත රසායනික ද්‍රව්‍ය, බැංකු සහ මූල්‍ය සහ බලශක්තිය ඇතුළු අංශ එකොළහක් ඔස්සේ ක්‍රියාත්මක වන ප්‍රමුඛ පෙළේ ඉන්දියානු අන්තර් ජාතික සමූහ ව්‍යාපාරයක් වන හින්දුජා සමූහයට අශෝක් ලේලන්ඩ් (Ashok Leyland) මෝටර් රථ නිෂ්පාදන ආයතනයද අයත්.
මේ කණ්ඩායම් දෙකම ශ්‍රී ලංකාව තුළ සැලකිය යුතු ලෙස ආයෝජනද සිදුකර තිබෙනවා.
