පකිස්තානයේ ටික්ටොක් තාරකාවක් ලෙස ජනප්‍රිය කාන්තාවකට අන්තවාදී මැර පිරිසක් විසින් ඇදුම් ඉරා දමා ම්ලේච්ඡ ලෙස පහරදී තිබේ.
එරට මාධ්‍ය වාර්තා කළේ ඇය තවත් පිරිසක් සමග ලාහෝර් නගරයේ ඉක්බාල් උද්‍යානයේ රූගත කිරීමක් සිදුකරමින් සිටියදී මෙම ප්‍රහාරය එල්ල වී ඇති බවයි.
එක්වරම එම ස්ථානයට කඩා වැදුණු 400 කට අධික මැර පිරිසක් ඇය වටකරගෙන පහරදී ඇදුම් ඉරා දමා ඇති අතර එම සිදුවීමට අදාළ වීඩියෝ මේ වන විට සමාජ මාධ්‍ය තුළ සැරිසරමින් පවතී.
සිද්ධියට මුහුණ දුන් අවස්ථාවේ තමන් සහ තම හිතවතුන් හඩා වැටෙමින් උදව් ඉල්ලා කෑගැසුවත් කිසිවෙකු තමන්ව ආරක්ෂා කිරීමට ඉදිරිපත් නොවූ බව ද ඇය මේ පිළිබදව පොලිසියට පැමිණිළි කරමින් පවසා ඇත.
පකිස්තාන කාන්තාවන්ගේ මානව අයිතිවාසිකම් උල්ලංඝනය වීම් සම්බන්ධ සිදුවීම් මෑතකාලීනව කැපී පෙනෙන ලෙස ඉහළ ගොස් ඇති අතර ඒ සම්බන්ධයෙන් එරට ජාතික මානව හිමිකම් කොමිසම ද පසුගියදා විශේෂ අවධානයක් යොමු කර තිබිණ.
