කොරෝනා සමඟ දරුණු ලෙස සටන් වැදීමට සිදුව ඇති ඉන්දියාවේ ළමුන් අතර පැතිර යන තවත් රෝගයක් පිළිබඳව Economic Times වාර්තා කරනවා.
බහු ඉන්ද්රිය ඉදිමීමේ රෝගය (multi-organ inflammatory syndrome) ලෙස හඳුන්වන මෙම රෝගය සම්බන්ධ සිද්ධීන් 100කටත් අධික ප්රමාණයක් පසුගිය දින 5ට උතුරු ඉන්දියාවෙන් පමණක් වාර්තාවී ඇති බවයි පැවසෙන්නේ.
කොවිඩ් රෝගයෙන් සුවපත් වන දරුවන් තුල මෙම තත්වය මතුවන අතර ළමා දැඩි සත්කාර පිළිබඳ ඉන්දියානු ඇකඩමිය පවසන ආකාරයට වයස 4-18ත් අතර වයස් පරාසයක රෝගීන් බහුලව වාර්තා වී ඇඇති නමුත් වයස මාස 6ක පමණ බිළිඳුන්ද මීට ගොදුරුවූ අවස්ථාද පවතින බවයි පැවසෙන්නේ.
මෙම රෝගයෙන් ළමුන්ගේ පෙනහළු, වකුගඩු සහ මොළය ඇතුළු සියලුම අවයව වලට බලපෑම් කළ හැකි බව කෝවිඩ් විශේෂඥ සහ ළමා රෝග විශේෂඥ වෛද්ය, ගංගා රාම් රෝහලේ ජ්යෙෂ්ඨ උපදේශක, ධිරෙන් ගුප්තා මහතා පවසයි.
කෙසේ වෙතත්, යමෙකු මුල් අවධියේදී රෝග ලක්ෂණ හඳුනා ගන්නේ නම්, රෝගීන්ට නිසි වේලාවට ප්රතිකාර කළ හැකි බවයි පැවසෙන්නේ. රෝග ලක්ෂණ ලෙස දින තුනක් හෝ පහකට වඩා පවතින උණ, දරුණු උදර වේදනාව, රුධිර පීඩනය හදිසියේ පහත වැටීම සහ පාචන තත්වය හඳුනාගෙන ඇත.
ඉන්දියාවේ ළමා ජනගහනයෙන් සියයට 26 ක් වයස අවුරුදු 14 ට අඩු අය වන අතර මෙම ප්රතිශතයෙන් අඩක් පමණ වයස අවුරුදු පහට අඩු අය බව ඉන්දියානු ළමා දැඩි සත්කාර ඇකඩමිය පවසයි.