කොවිඩ් ප්‍රතිශක්තිකරණ එන්නතේ පළමු මාත්‍රාව ලබාගත් අය සඳහා දෙවන මාත්‍රාව ලබාදීම මාතර මහ රෝහලේ දී ඊයේ (02) සිදු කෙරුණා.
කෙසේ වෙතත් එන්නත් ප්‍රමාණවත් නොවීම හේතුවෙන් පිරිසක් හරවා යැවීමට සෞඛ්‍ය බලධාරීන් කටයුතු කිරීමත් සමඟ එම ස්ථානයේ උණුසුම් තත්ත්වයක් හටගත්තා.
ඊට හේතුවී ඇත්තේ පසුගිය ජූලි මස 24 සිට 30 දක්වා කාලසීමාව තුළ පළමු මාත්‍රාව පුද්ගලයින් 11,500 කට ලබාදී තිබූ අතර දෙවන මාත්‍රාව ලෙස ලබාදීමට ඊයේ දිනය වන විට ලැබී තිබී ඇත්තේ එන්නත් 6500 ක් පමණක් වීමයි.
මේ හේතුවෙන් ජූලි මස 24, 25 සහ 26 දිනවලදී එන්නත් ලබාගත් පිරිස් වෙත පමණක් එන්නත ලබාදීමට තීරණය කර අනෙක් පිරිස හරවා යැවීමට මාතර රෝහල් බලධාරීන් කටයුතු කර තිබෙනවා.
එමෙන්ම එම දින තුන තුළද එන්නත් ලබාගත් පිරිසෙන් කොටසකටද එන්නත් හිඟවී හරවා යැවීමට උත්සාහ කිරීම නිසා ගැටළුව තවත් වර්ධනය වූ බව අප මාතර වාර්තාකරු සදහන් කළා.
මෙම එන්නත් හිඟයේ සිදුවීම රූගත කිරීම නිසා රෝහල් ආරක්ෂක අංශයේ පුද්ගලයෙකු විසින් එම මාධ්‍යවේදියාට බැනවැදුණා.
කෙසේවෙතත් පසුව එම ස්ථානයට පැමිණි රෝහල් වෛද්‍යවරයෙකු විසින් එම සිදුවීම සම්බන්ධයෙන් තමන් කණගාටුව පලකරන බව ප්‍රකාශ කර තිබුණා.
