අම්බලන්තොට ප්‍රාදේශීය ලේකම් කොට්ඨාශයේ පිහිටා ඇති කලමැටිය කලපුව ආශ්‍රිත අභයභූමිය දෙස් විදෙස් පක්ෂීන්ගේ නවාතැන් පලක් ලෙසට ලෝක ප්‍රසිද්ධියට පත්ව ඇති ස්ථානයකි.
පක්ෂීන්ට ඇලුම්කරන දෙස් විදෙස් සංචාරකයන්ගේ නිබඳ ආකර්ශණයට ලක්ව ඇති මෙම අභය භූමියත් උස්සන්ගොඩ ජාතික වන උද්‍යානයත් අතර අක්කර 250කට ආසන්න භූමියක් අවශේෂ කැලෑ පද්ධතියක් ලෙස පවතියි.
මෙම භූමියේ භාරකාරත්වය හිමිව ඇත්තේ අම්බලන්තොට ප්‍රාදේශීය ලේකම් වරයා සතුවයි.
මේ වන විට විවිධ පිරිස් තම පරම්පරාවෙන් මෙම අවශේෂ කැලය තුල වගාවන් පවත්වාගෙන ගිය බව පවසමින් අනවසරයෙන් ඉඩම් කොටස් වෙන්කර ගනිමින් සිටියි.
මේ පිළිබඳව අප විසින් ප්‍රදේශවාසීන්ගෙන් විමසූ විට ඔවුන් පැවසූවේ ගමේ පදිංචිකරුවන් මෙන්ම විවිධ ප්‍රදේශවලින් පැමිණෙන පිරිස් විසින් දිගින් දිගටම මෙම අවශේෂ කැලය අනවසරයෙන් එළිකරමින් සිටින බවයි.
ඒ සමහර පුද්ගලයන්ගේ මුහුණු තමන් මීට පෙර කිසි දිනක නැති මුහුණු වන අතර මාස 6ක පමණ කාලයක සිට මෙම තත්වය ආරම්භ වී ඇති බවද ඔවුන් විසින් කියා සිටියි.
අප කලමැටිය වනජීවී කාර්යාලයේ නිළධාරීන්ගෙන් මේ පිළිබඳව විමසා සිටි අවස්ථාවේදී ඔවුන් සඳහන් කලේ කලමැටිය අභයභූමිය යනු කලපුවක් වන අතර වසරේ වර්ෂාව අධික කාලවලදී එම කලපුව ජලයෙන් යටවන බවත්, එම කාලවලදී අභයභූමිය තුල වෙසෙන කුඩා සතුන් ආරක්ෂාව සඳහා සැඟවී සිටින්නේ තර්ජනයට ලක්ව ඇති අවශේෂ කැලය තුල බවයි.
