කැලෑ ගිනි තබන්නන්ට හා සතුන් දඩයම් කරන්නන්ට එරෙහිව දැඩිව නීතිය ක්‍රියාත්මක කරන ලෙස වන සම්පත් සංරක්ෂණ ආමාත්‍ය පවිත්‍රා වන්නිඅරච්චි මහත්මිය නිලධාරීන්ට උපදෙස් ලබා දී තිබෙනවා.
ඒ ඊයේ(25) කොළඹ පැවති සාකච්ඡාවකට එක්වෙමින්.
එමෙන්ම මෙහිදී වනාන්තර ගිනි තැබීම වැළැක්වීමට ගත යුතු ක්‍රියාමාර්ග හා ඒ පිළිබඳව ජනතාව දැනුවත් කිරීම සඳහා ගත යුතු ක්‍රියාමාර්ග ඇතුළත් කැබිනට් පත්‍රිකාවක් ද ඉදිරිපත් කිරීමට යෝජනා වී තිබෙනවා.
මෙහිදී ගම් මට්ටමින් ජනතාව දැනුවත් කිරීමේ වැඩසටහනක් ක්‍රියාත්මක කිරීමට ද තීරණය කෙරුණු අතර ලැව්ගිනි නැවැත්වීමට ගිනි පටි කැපීම සහ ජල සම්පීඩක යන්ත්‍ර යොදා ජල පාලනය කළ යුතු බවත් වනජීවී නිලධාරීන් පෙන්වා දී තිබෙනවා.
වියළි කාලගුණ තත්ත්වයත් සමඟ වනාන්තර සහ රක්ෂිත ගිනි ගැනීම් ඉහළ ගොස් තිබෙන බවත් ඉන් හෙක්ටයාර 6000කට වැඩි ප්‍රමාණයක් විනාශ වී ඇති බවත් ජාතික ආපදා කළමනාකරණ මධ්‍යස්ථානය සඳහන් කළා.
