හිටපු ජනාධිපති මෛත්‍රිපාල සිරිසේන මහතාගේ මූල්‍ය අක්‍රමිකතා සම්බන්ධයෙන් ඒ මහතා ජනාධිපති ධූරය දරන සමයේ ජනාධිපති මාධ්‍ය අංශයේ මාධ්‍ය අධ්‍යක්ෂකවරයා වශයෙන් කටයුතු කළ ඕෂල හේරත් මහතා සිය ෆේස්බුක් පිටුවේ සටහනක් තබා තිබෙනවා.
ඔහු පවසන්නේ මෛත්‍රිපාල සිරිසේන මහතා ජනාධිපති ධූරය දරණ සමයේ ඔහුගේ දියණිය වන චතුරිකා සිරිසේන මහත්මියට අයත් Red Cherry හා Media Gang යන දැන්වීම් ප්‍රචාරක ආයතනවලට ජනාධිපති මාධ්‍ය ඒකකයේ කොන්ත්‍රාත් රැසක් ලබාදුන් බවයි.
ඒම කරුණ පමණක්ම මෛත්‍රිපාල සිරිසේන මහතා කෙතරම් දූෂිත පුද්ගලයෙක්දැයි වටහා ගැනීමට ප්‍රමාණයත් බවට ඕෂල හේරත් මහතා සදහන් කරනවා.
2018 වසරේදී අනිද්දා පුවත්පතට ලිපියක් සම්පාදනය කරමින් මාධ්‍යවේදී ලසන්ත රුහුණගේ මහතා එවක ජනාධිපති මෛත්‍රිපාල සිරිසේන මහතාගේ දියණියවන චතුරිකා සිරිසේන මහත්මියට අයත් සුරාසැලක් පිළිබදව තොරතුරු වාර්තා කළා.
ඊට අනුව පොළොන්නරුව බැඳිවැව විසිතුන්වන සැතපුම් කණුවේ පිහිටි චතුරිකා සිරිසේනට අයත් ‘තිදස් අරණ’ හෝටලයට චතුරිකා සිරිසේන මහත්මිය සිය පියා ජනාධිපතිවරයා වූ පසුව මත්පැන් බලපත්‍රයක් ලබාගෙන තිබුණා.
2015.06.16 දින සිට ක්‍රියාත්මක වන පරිදි මෙම හෝටලයට සංචාරක මණ්ඩලයේ A ශ්‍රේණියේ අනුමැතියද සහිතව මෙම බලපත‍්‍රය ලබාගෙන ඇති අතර බලපත‍්‍ර හිමිකාරිය වශයෙන් සදහන් වන්නේ පල්ලේවත්ත ගමරාලලාගේ දර්ශණි චතුරිකා පල්ලේවත්ත යන නාමයයි.
