තලේබාන් සංවිධානය බලය අල්ලා ගැනීමෙන් පසු ඇෆ්ගනිස්ථානයේ මාධ්යවේදීන්ට එරෙහි අපරාධ අධික ලෙස ඉහළ ගොස් ඇති බව ඇෆ්ගනිස්ථානයේ එක්සත් ජාතීන්ගේ සහය දූත මණ්ඩලය (UNAMA) සිය වාර්තාවක් මගින් හෙළි කර තිබේ.
එහි සදහන් වන්නේ ගතවූ කාලසීමාවේ දී අවම වශයෙන් මාධ්යවේදීන් 200 දෙනෙකුගේ මානව හිමිකම් උල්ලංඝනය වී ඇති බවයි.
මාධ්යවේදීන්ට එරෙහි අපරාධ සඳහා වූ ජාත්යන්තර දිනය නිමිත්තෙන් UNAMA පැවසුවේ මාධ්ය මර්දනය රට තුළ තවමත් පවතින බවත්, අත්තනෝමතික ලෙස රඳවා තබා ගැනීම සහ බිය ගැන්වීම් කාබුල්හි මාධ්යවේදියෙකුගේ ජීවිතයේ කොටසක් බවයි.
තම දූත මණ්ඩලය විසින් 2021 අගෝස්තු මාසයේ සිට ඇෆ්ගනිස්ථානයේ මාධ්යවේදීන් 200 කට අධික සංඛ්යාවකගේ මානව හිමිකම් උල්ලංඝනය කිරීම් වාර්තා කර ඇති බවද එම සංවිධානය හෙළි කළේය.
වාර්තා කර ඇති ඉහළ මානව හිමිකම් උල්ලංඝනය කිරීම් අතර අත්තනෝමතික ලෙස අත්අඩංගුවට ගැනීම, අයහපත් ලෙස සැලකීම, තර්ජන සහ බිය ගැන්වීම් ඇතුළත් වන බව වාර්තාවේ සදහන් වේ.
ඇෆ්ගනිස්ථානයේ මාධ්ය අනතුරේ බවත් සැවොම මාධ්යවේදීන් ආරක්ෂා කිරීමටත් ඔවුන්ට එරෙහි මර්දනය අවසන් කිරීමට කටයුතු කළ යුතු බවත් එහි දැක්වේ.
මේ අතර මෙම වසරේ ලොව පුරා මාධ්යවේදීන් 70 කට වැඩි පිරිසක් ඔවුන්ගේ රැකියාව හේතුවෙන් මිය ගොස් ඇති බව එක්සත් ජාතීන්ගේ මහලේකම් ඇන්ටෝනියෝ ගුටරෙස් ප්රකාශ කළ බව මාධ්ය වාර්තා කර ඇත.