ආයෝජන ප්‍රවර්ධන අමාත්‍යංශය යටතට තවත් සමාගම් කිහිපයක් පවරමින් ජනාධිපති ගෝඨාභය රාජපක්ෂ මහතා විසින් ගැසට් නිවේදනයක් නිකුත් කර තිබේ.
ඒ අනුව රක්නා ලංකා ආරක්ෂක සමාගම, සෙලෙන්දිවා ඉන්වෙස්ට්මන් සහ හොටෙල් ඩිවලපර්ස් (ලංකා) පෞද්ගලික සමාගම ඊට අයත්ය.
ජයට අනුබද්ධ පෞද්ගලික ආරක්ෂක සේවාවක් වන රක්නා ලංකා සමාගම මීට පෙර ආරක්ෂක අමාත්‍යාංශය යටතේ පැවති අතර සෙලෙන්දිවා ඉන්වෙස්ට්මන් සහ හොටෙල් ඩිවලපර්ස් (ලංකා) පෞද්ගලික සමාගම, නාගරික සංවර්ධන හා නිවාස අමාත්‍යාංශය යටතේ පැවතුණි.
ආයෝජන ප්‍රවර්ධන අමාත්‍ය ලෙස ව්‍යාපාරික ධම්මික පෙරේරා මහතා පසුගියදා දිවුරුම් දුන්නේය.
එවක රට තුළ පැවති ආරක්ෂක වාතාවරණය හමුවේ ආර්ථික මර්මස්ථාන, රාජ්‍ය සහ පෞද්ගලික ආයතන ඇතුළු විශේෂ ස්ථාන තුළ ආරක්ෂාවට යොදවා සිටි සන්නද්ධ හමුදා සාමාජිකයන් එම ස්ථානවලින් ඉවත් කර නීතිය හා සාමය රැකීමේ කටයුතු සඳහා යෙදවූ බැවින් ඉහත කී ආයතනවලට ආරක්ෂාව සැපයීම සඳහා රක්නා ආරක්ෂක ලංකා සමාගම පිහිටුවීමට කටයුතු කළ බව 2016 දෙසැම්බර් 07වන දින පැවති කැබිනට් තීරණ දැනුම්දීමේ ප්‍රවෘත්ති සාකච්ඡාවේදී හෙළි කෙරිණ.
රට තුළ පවතින සාමකාමී වාතාවරණය යටතේ රජයට අනුබද්ධ පෞද්ගලික ආරක්ෂක සේවාවක් පවත්වා ගෙන යෑමේ අවශ්‍යතාවක් නොමැති බව පෙනී ගොස් ඇති බැවින් සීමාසහිත රක්නා ආරක්ෂක ලංකා සමාගම ඈවර කිරීම සඳහා ජනාධිපතිවරයා විසින් ඉදිරිපත් කරන ලද යෝජනාවට කැබිනට් මණ්ඩලයේ අනුමැතිය හිමි විය. ඒ අනුව රක්නා ආරක්ෂක ලංකා සමාගම විසින් ඉටු කළ ලබන ගොඩබිම් ආරක්ෂක කටයුතු සිවිල් ආරක්ෂක දෙපාර්තමේන්තුව වෙත ද සාගර ආරක්ෂක කටයුතු ශ්‍රී ලංකා නාවික හමුදාව වෙත ද පැවරීමටත් නීතිපතිවරයාගේ උපදෙස් අනුව එම සමාගම ඈවර කිරීම සඳහා අවශ්‍ය කටයුතු යෙදීමටත් කැබිනට් මණ්ඩලයේ අනුමැතිය හිමි විය.
සීමාසහිත රක්නා ආරක්ෂක ලංකා සමාගම වසා දැමීමට ගෙන තිබූ තීරණය ඉවත්කර එම ආයතනය යළි සාමාන්‍ය පරිදි පවත්වා ගෙන යන ලෙසට 2017 මැයි මස පැවැති ආරක්ෂක අමාත්‍යංශ ප්‍රගති සමාලෝචන රැස්වීමේදී ජනාධිපති මෛත්‍රීපාල සිරිසේන මහතා දැනුම්දී ඇත.
එම ආරක්ෂක සමාගමේ ගොඩබිම් හා මුහුදු ආරක්ෂකයන් ලෙස 1500කට ආසන්න පිරිසක් සේවය කරන බැවින් සහ රණවිරුවන් වැඩි සංඛ්‍යාවකට මෙහි රැකියා ලබාදීමටද අපේක්ෂා කෙරෙන බැවින් සමාගම යලි පිහිටුවන ලෙසයි සමාගම ඈවර කිරීමට යෝජනා කළ ජනාධිපති මෛත්‍රීපාල සිරිසේන විසින්ම නැවත දැනුම් දී ඇත්තේ.
