ශ්‍රී ලංකා-චීන පාර්ලිමේන්තු මිත්‍රත්ව සංගමයේ නව සභාපතිවරයා ලෙස තරුණ හා ක්‍රීඩා අමාත්‍ය නාමල් රාජපක්ෂ මහතා අද (22) තේරී පත් වුණා.
කතානායක මහින්ද යාපා අබේවර්ධන මහතාගේ ප්‍රධානත්වයෙන් පැවති ශ්‍රී ලංකා – චීන පාර්ලිමේන්තු මිත්‍රත්ව සංගමයේ පුනර්ජීවන රැස්වීමේදී මෙම පත්වීම සිදුකර තිබෙනවා.
එමෙන්ම ශ්‍රී ලංකා – චීන පාර්ලිමේන්තු මිත්‍රත්ව සංගමයේ ලේකම්වරයා ලෙස පාර්ලිමේන්තු මන්ත්‍රී ප්‍රේම්නාත් සී. දොලවත්ත මහතා පත් කෙරුණා.
දෙරට අතර මිත්‍රත්වය පුනර්ජීවනය කිරීමේ අරමුණින් පැවති මෙම රැස්වීමට පාර්ලිමේන්තු මහලේකම් ධම්මික දසනායක මහතා සහ ශ්‍රී ලංකාවේ චීන තානාපති ක්වි ෂෙන්හෝං මහතා සහභාගී වුණා.
(ආචාර්ය) උපුල් ගලප්පති, අරවින්ද් කුමාර් සහ සෙල්වම් අඩකලානාදන් යන මහත්වරුන් නියෝජ්‍ය සභාපති ලෙස තේරී පත් වූ අතර, නියෝජ්‍ය ලේකම් ලෙස මොහොමඩ් මුසම්මිල් සහ භාණ්ඩාගාරික ලෙස ඉෂාක් රාහුමාන් යන අය තේරී පත් වී තිබෙනවා.
මෙහිදී අදහස් දක්වමින් කතානායක මහින්ද යාපා අබේවර්ධන මහතා කියා සිටියේ ශ්‍රී ලංකාව හා චීනය අතර සබඳතා ක්‍රි.පූ. 206 තරම් අතීතයට දිව යන බවත් 1957 දී නිල රාජ්‍ය තාන්ත්‍රික සබඳතා ඇති වූ දා සිට දෙරට අතර ඉතා ගැඹුරු හා විවිධත්වයකින් යුත් සම්බන්ධතාවයක් පවතින බවයි.
COVID-19 වෛරසයෙන් ආරක්ෂා වීමට චීන රජය විසින් ශ්‍රී ලංකාවට ලබා දී ඇති ශක්තිමත් සහයෝගය කතානායකවරයා මෙහිදී අගය කළ අතර ශ්‍රී ලංකාවේ විදේශ සංචිත ආරක්ෂා කිරීමේ මූලික මූලාශ්‍රය චීනය බවද පවසා සිටියා.
කථානායකවරයා කියා සිටියේ 8 වන පාර්ලිමේන්තුවේදී ශ්‍රී ලංකා පාර්ලිමේන්තු මන්ත්‍රීවරුන්ට සහ පාර්ලිමේන්තු කාර්ය මණ්ඩලයට චීන රජයෙන් ලබා දුන් අධ්‍යාපන චාරිකාව හේතුවෙන් 2016 දී පාර්ලිමේන්තු මන්ත්‍රීවරයෙකු වශයෙන් තමන්ටත් චීනයේ සංචාරය කිරීමට අවස්ථාව ලැබුණු බවයි.
රැස්වීම අමතමින් ශ්‍රී ලංකාවේ චීන තානාපති ක්වි ෂෙන්හෝං මහතා ශ්‍රී ලංකා-චීන පාර්ලිමේන්තු මිත්‍රත්ව සංගමය නැවත ස්ථාපිත කිරීම පිළිබඳව සිය උණුසුම් සුබ පැතුම් එක් කළා.
