වෙළඳපොලේ සහල් මිල කෙතරම් ඉහළ ගියද ඉතා අඩු මිලට සහල් අලෙවි කිරීමට සතොස හරහා කටයුතු කරන බව වෙළඳ අමාත්‍ය බන්දුල ගුණවර්ධන මහතා පවසනවා.
ඒ, ඊයේ (13) දින අම්බලන්ගොඩ ප්‍රදේශයේ පැවති උත්සවයක් අමතමින්.
ඒ අනුව, මෙම වසර අවසන් වනතෙක් නාඩු සහල් කිලෝවක් රුපියල් 105 ට අඩුවෙන් සහ සුපිරි සම්බා කිලෝවක් රුපියල් 130 ට අඩුවෙන් මිලදී ගැනීමට පාරිභෝගිකයන්ට අවස්ථාව ලබාදෙන බවයි ඇමතිවරයා පවසන්නේ.
වසර අවසානය තෙක් ඊට වඩා සතයක් හෝ මිල ඉහළ නොදමන බවත් ඒ පිළිබඳව වගකීම වෙළඳ අමාත්‍යවරයා ලෙස තමා බාර ගන්නා බවත් ඉදිරි කාලයේදී සතොස අලෙවිසැල්වල අලෙවි කිරීම සඳහා අවශ්‍ය ප්‍රමාණවත් සහල් තොග මේ වනවිටත් රැස් කරගෙන ඇති බවත් ඔහු පවසනවා.
මේ අතර, සතොස හරහා මුං ඇට කිලෝවක් රුපියල් 225 බැගින් අලෙවි කරන බවද බන්දුල ගුණවර්ධන මහතා පවසනවා.
ආණ්ඩුව ගොවීන්ගෙන් රුපියල් 450 බැගින් මුංඇට මිලදී ගන්නා නමුත් රුපියල් 225 බැගින් එම මුංඇට අලෙවි කරන ලෙස ජනාධිපතිවරයා උපදෙස් දුන් බවත්, එම උපදෙස් අනුව පාඩුව දරා ගනිමින් රුපියල් 225 බැගින් සතොස අලෙවිසැල්වල මුංඇට අලෙවි කරන බවත් ඇමතිවරයා පවසනවා.
