ආහාර සුරක්ෂිතතාව සහ කෘෂිකර්මය පිළිබඳ පාර්ලිමේන්තු ආංශික අධීක්ෂණ කාරක සභාව විසින් පාර්ලිමේන්තුවට ඉදිරිපත් කළ නව ධීවර හා ජලජ සම්පත් (සංශෝධන) පනත් කෙටුම්පත සම්මත කරගෙන තිබෙනවා.
පාර්ලිමේන්තු මන්ත්‍රී ඩී.වීරසිංහ මහතාගේ ප්‍රධානත්වයෙන් පැවැත්වුණු මෙම කමිටුව සඳහා ධීවර අමාත්‍යාංශයේ ප්‍රධාන නිලධාරීන් සහභාගි වී තිබුණා.
එහිදී ඉදිරිපත් කර ඇති පනත බලාත්මක වුවහොත් ශ්‍රී ලංකා මුහුදු තීරයේ නීති විරෝධී ලෙස ධීවර කටයුතුවල නිරත වන ඉන්දීය ධීවරයන්ට හා ශ්‍රී ලංකා මුහුදේ මෙවැනි ක්‍රියාවන්හි යෙදෙන ඕනෑම කෙනෙකුට එරෙහිව දැඩි ක්‍රියාමාර්ග ගත හැකි වන බව වාර්තා වෙනවා.
දැනට පවතින නීතිමය ප්‍රතිපදාන යටතේ නීති විරෝධී මසුන් ඇල්ලීම (IUU) සඳහා බලපත්‍ර හිමියා පමණක් වරදකරු බවට පෙන්වා දුන්නත් ධීවර පනත මඟින් මෙහිදී බලපත්‍ර හිමියා යනුවෙන් හැඳින්වෙන්නේ කවුරුන්ද යන්න අර්ථකථනය කර නැහැ.
නව නීතියට අනුව, බෝට්ටුවේ හිමිකරුට අමතරව, බෝට්ටුවේ නියමුවා මෙන්ම බෝට්ටුවේ සිටින ඕනෑම පුද්ගලයෙකුට නීති විරෝධී මසුන් ඇල්ලීම සඳහා චෝදනා ගොනු කළ හැකි වෙනවා .
ධීවර අමාත්‍යංශය පවසන්නේ උතුරු මුහුදේ ශ්‍රී ලංකා මුහුදු සීමාව තුළ ඉන්දීය ධීවරයින් විසින් මසුන් ඇල්ලීම සම්බන්ධයෙන් මෙම නීතිය බලාත්මක කිරීමට පියවර ගන්නා බවයි.
මුහුදු සීමාව සම්බන්ධයෙන් ඇති මෙම ගැටලුව පිළිබඳව ශ්‍රී ලංකාව හා ඉන්දියාව අතර වසර ගණනාවක් තිස්සේ ද්විපාර්ශ්වික සාකච්ඡා පවත්වා තිබුණත් එය තවමත් නොවිසඳෙන මට්ටමක පවතින බවද වාර්තා වෙනවා.
