කොළඹ විශ්ව විද්‍යාලයේ වෛද්‍ය පීඨ ශිෂ්‍ය සංගමය රජයට විරෝධය පළ කරමින් සංවිධානය කළ විරෝධතා රැළියක් වළක්වන ලෙස කුරුඳුවත්ත පොලිසිය කළ ඉල්ලීමක් කොළඹ ප්‍රධාන මහේස්ත්‍රාත් තිළිණ ගමගේ මහතා අද (26) ප්‍රතික්ෂේප කළා.
ඉල්ලීම ප්‍රතික්ෂේප කරමින් මහේස්ත්‍රාත්වරයා සඳහන් කර ඇත්තේ මහජන පීඩාවක් හෝ අනර්ථයක් සිදුවන්නේ නම් පොලිස් බලතල අනුව ක්‍රියාත්මක විය යුතු අතර ඊට අධිකරණ නියෝග අවශ්‍ය නොවන බවයි.
වෛද්‍ය පීඨයේ සිසුන් 250කට අධික පිරිසක් ලිප්ටන් වටරවුම හා ඊට ආසන්න තදාසන්න ප්‍රදේශවල විරෝධතාවයක් සංවිධානය කර ඇති බව අධිකරණය හමුවේ කරුණු දක්වමින් පොලීසිය පෙන්වා දී තිබුණා/
පොලීසිය තවදුරටත් පවසා ඇත්තේ කොතලාවල ආරක්ෂක විශ්ව විද්‍යාලය මඟින් මුදලට වෛද්‍ය උපාධිය ලබා දීමට එරෙහිව මෙම උද්ඝෝෂණය සංවිධානය කර ඇති බවට තොරතුරු අනාවරණය වන බවයි.
අද (26) සවස තුනට ආරම්භ වන මෙම උද්ඝෝෂණය මඟින් සිදුවන මහජන පීඩා අවම කර ගැනීම සඳහා වෛද්‍ය පීඨයේ සභාපති ඇතුළු පිරිසට තහනම් නියෝගයක් නිකුත් කරන ලෙස කුරුඳුවත්ත පොලිසිය අධිකරණයෙන් ඉල්ලා තිබුණා.
කරුණු සලකා බැලූ ප්‍රධාන මහේස්ත්‍රාත්වරයා අදාළ ඉල්ලීම ප්‍රතික්ෂේප කිරීමට තීරණය කර තිබෙනවා.
