කටාර්, එක්සත් අරාබි එමීර් රාජ්ය, සෞදි අරාබිය, ඕමානය, බහරේන් සහ කුවේට් යන රටවලින් මගීන් ගෙන්වීම් තාවකාලිකව තහනම් කිරීමට කොවිඩ්-19 වැළැක්වීමේ ජාතික මෙහෙයුම් මධ්යස්ථානය තීරණය කර තිබේ.
කොවිඩ්-19 වැළැක්වීමේ ජාතික මෙහෙයුම් මධ්යස්ථානය ඊයේ පස්වරුවේ (28) මෙම තීරණයට එළැඹ ඇති අතර මේ පිළිබඳ කැබිනට් මණ්ඩලය ද දැනුම්වත් කිරීමට පියවර ගන්නා ලදී.
මෙම පියවර ගල්ෆ් කලාපයෙන් ආපසු පැමිණීමට අපේක්ෂා කරන ශ්රී ලාංකිකයන් කිහිප දෙනෙකුට බලපානු ලබන අතර ශ්රී ලංකාවට නැවත පැමිණීමට අපේක්ෂා කරන ශ්රී ලාංකිකයන් අතර නොසන්සුන්තාවක් ඇති කිරීමට ද බලපා ඇතැයි ඩේලි මිරර් පුවත්පත වාර්තා කර තිබේ.
ඒ අනුව 2021 ජූලි මස 1 වන දින සිට බලපැවැත්වෙන පරිදි ගල්ෆ් සහයෝගිතා කවුන්සිලයේ රටවල් හයේ මගීන්ට ශ්රී ලංකාව බලා පිටත්ව ඒමට අවසර නොදෙන බව සඳහන් ය. 2021 ජූලි 13 වන දක්වා මෙම තහනම ක්රියාත්මක වේ.
ගල්ෆ් කලාපයෙන් ශ්රී ලංකාවට පැමිණි අය අතර කොවිඩ්-19 ආසාදිතයින් 100 කට අධික සංඛ්යාවක් හඳුනාගෙන ඇති බැවින් මෙම තීරණය ගෙන ඇති බව ආරංචි මාර්ග සඳහන් කරයි.