එක්දින ලෝක කුසලාන තරගාවලියට සුදුසුකම් ලැබීමේ තරගාවලියේ අවසන් මහා තරගය ශ්‍රී ලංකාව සහ නෙදර්ලන්තය අතර සිම්බාබ්වේ හරාරේ ක්‍රීඩාංගනයේ දී අද (09) පැවැත්වුණා.
ප්‍රථමයෙන් කාසියේ වාසිය දිනාගැනීමට නෙදර්ලන්තය කණ්ඩායම සමත් වූ අතර එම කණ්ඩායම තීරණය කළේ පළමුවෙන් පන්දු යැවීමටයි.
එහිදී ප්‍රථමයෙන් පන්දුවට පහර දුන් ශ්‍රී ලංකා කණ්ඩායම පන්දුවාර 47යි පන්දු05ක් අවසානයේ, කඩුලු සියල්ල දැවී, ලකුණු 233 රැස් කරා.
පන්දුවට පහරදීමේදී ශ්‍රී ලංකා කණ්ඩායම වෙනුවෙන් සහන් ආරච්චිගේ ලකුණු 57 ක්, කුසල් මෙන්ඩිස් ලකුණු 43 ක්, පැතුම් නිස්සංක ලකුණු 23 ක් හා චරිත් අසලංක ලකුණු 36 ක් ලබා ගත්තා.
පන්දු යැවීමේදී නෙදර්ලන්ත කණ්ඩායම වෙනුවෙන් Ryan Klein කඩුලු 2 ක්, Saqib Zulfiqar කඩුලු 2 ක්, හා Vikramjit Singh කඩුලු 2 ක් බිඳ හෙළිමට සමත් වුණා.
පිළිතුරු ඉනිම ක්‍රීඩා කළ නෙදර්ලන්ත කණ්ඩායමට පන්දුවාර 24 ක් අවසානයේ සියලු දෙනා දැවී ලබා ගැනීමට හැකියාව ලැබුණේ ලකුණු 105 ක් පමණයි.
පන්දු යැවීමේදී ශ්‍රී ලංකා කණ්ඩායම වෙනුවෙන් දිල්ෂාන් මදුෂංක කඩුලු 3 ක්, මහීෂ් තීක්ෂණ කඩුලු 4 ක් හා වනිඳු හසරංග කඩුලු 2 ක් බිඳ හෙළීමට සමත් වුණා.
විශිෂ්‍ට පන්දු යැවීමක නිරත වූ ශ්‍රී ලංකා කණ්ඩායම නෙදර්ලන්ත කණ්ඩායමේ මුල් කඩුළු 5ම ලකුණු 50කට පෙර දවා ගැනීමට සමත් වුණා.
ICC ලෝක ක්‍රිකට් කුසලානයට සුදුසුකම් ලබා ගැනීමේ තරගාවලියේ අවසන් මහා තරගය ලකුණු 128 කින් ජය ගැනීමත් සමඟ එක්දින ලෝක කුසලාන තරගාවලියට සුදුසුකම් ලැබීමේ තරගාවලියේ සියළුම තරග ශ්‍රී ලංකා කණ්ඩායම ජය ගැනීමට සමත් වී තිබෙනවා.
එමෙන්ම ආබාධයක් හේතුවෙන් ශ්‍රී ලංකා කණ්ඩායමේ ආරම්භක පිතිකරු දිමුත් කරුණාරත්න අද තරගය සඳහා සහභාගී නොවූ අතර, මෙම තරගයේ දී සහන් ආරච්චිගේ තම මංගල එක්දින අර්ධ ශතකය වාර්තා කිරීමට ද සමත් වුණා.
