ලංකාවේ ක්‍රෙඩිට් කාඩ් සහ බැංකු කාඩ්පත් භාවිත කොට අන්තර්ජාලය හරහා ඩොලර් භාවිතා කොට ගෙවීම් කටයුතු කිරීමට තිබූ අවස්ථාව පසුගිය 18දා සිට අත්හිටුවා ඇතැයි ශ්‍රී ලාංකික ව්‍යාපාරිකයෝ සහ එම ක්ෂේත්‍රයේ ගනුදෙනුකරුවෝ කියති.
ඔවුන් අද (20) තම බැංකු කාඩ්පත් උපයෝගී කරගනිමින් අන්තර්ජාල ගෙවීම් කිරීමට උත්සාහ කළ ද එය 20දා වූ තැන අදාළ බැංකුවලින් මේ ගැන විමසා ඇත.
එහිදි ඔවුන්ට දැනගැනීමට ලැබී ඇත්තේ ඩොලර් ගනුදෙනු කිරීමට අවස්ථාව නොමැති බැවින් විකල්ප සොයා ගන්නා ලෙසට ය.
තමන්ගේ ව්‍යාපාර කටයුතු සමාජ මාධ්‍ය ජාලා මගින් මුදල් ගෙවා ප්‍රවර්ධනය කරන විශාල පිරිසක් මේ නිසා දැඩි අර්බුදයකට මුහුණ දී සිටිති.
පේපැල් මාර්ගයෙන් අන්තර්ජාල ව්‍යාපාර කටයුතු කරන බොහෝ පිරිසකට ද නිසා සිය කටයුතු අත්හිටුවීමට සිදුව තිබේ.
ව්‍යාපාර කටයුතු වෙනුවෙන් විදේශගතව සිටිමින් ශ්‍රී ලාංකික බැංකු කාඩ්පත් භාවිත කරන විශාල පිරිසක් ද මේ නිසා දැඩි අපහසුතාවයකට පත්ව සිටින අතර, හදිසියේම මෙම තත්ත්වයට මුහුණ දීමට සිදුවීම නිසා තම දෛනික වැඩකටයුතු සම්පූර්ණයෙන්ම නතර කර දමන්නට සිදුව ඇති බව ඔවුහු පවසති.
මෙම ගැටළුව සම්බන්ධයෙන් මෙරට බැංකු කළමනාකරුවෙකුගෙන් විමසූ අවස්ථාවේදී ඔහු පැවසුවේ ශ්‍රී ලංකාවේ ඩොලර් සංචිතය ඉතා අඩු මට්ටමක පවතින හෙයින් ඩොලර් විදේශයන්ට ඇදීයාම නතර කිරීම සඳහා මහබැංකුව මෙම පියවර ගෙන ඇති බවයි.
වෙනත් විකල්ප ක්‍රියාමාර්ග අනුගමනය කරන ලෙස මෙරට බැංකු තම ගනුදෙනුකරුවන්ට උපදෙස් දී ඇතත් එම විකල්ප මොනවාදැයි සඳහන් කර නැති බවද ගනුදෙනුකරුවෝ සඳහන් කරති.
